Kryetari i OVL-UÇK, Hysni Gucati, ka reaguar për zhvillimin e seancës së sotme gjyqësore ndaj ish-presidentit të Kosovës, Hashim Thaçi, në Hagë për nder të festës së 28-Nëntorit.
Gucati e ka cilësuar seancën si të padrejtë dhe ka theksuar se është një formë e provokimit ndaj kombit shqiptar.
Sipas tij, qëllimi i këtyre seancave është që të ulin moralin e Thaçit, Veselit, Jakupit e Rexhepit.
Në emisionin “Ditari” në Tëvë1, Gucati ka theksuar se këto festa janë të zbehta për shkak të padrejtësisë që po iu bëhet ish-krerëve të UÇK-së që po gjykohen në Hagë.
“Ne që tri ditë kemi pasur aktivitete të pandërprera, të gjitha këto festa që po na vijnë neve janë të zbehta për arsye se i kemi njerëzit tanë të cilët luftuan për çlirimin e vendit për të formuar shtetin dhe sot ata gjinden padrejtësisht në një Gjykatë padrejtë ndaj shqiptarëve apo edhe ndaj pjesëtarëve të UÇK-së, as ne nuk ndjehemi të lirë pa ardhjen e tyre në Kosovë.
Seanca e sotme ndaj Hashim Thaçit në Hagë, është e padrejtë, prokurorët dhe gjyqtarët gjithmonë janë duke na provokuar neve si komb, sepse pikërisht për këto data festive ata shkojnë dhe caktojnë seanca dhe mbahen. Seanca e sotme për ne është e papranueshme dhe e qëllimshme, unë mendoj që ata tentojnë që Thaçin dhe të tjerët të paktën t’i ulin moralisht”, ka deklaruar Gucati./teve1.info/
