Sulmet ajrore izraelite në Gazën qendrore i kanë vrarë së paku 18 njerëz, përfshirë fëmijë, gjatë mbrëmjes, thanë të premten zyrtarët shëndetësorë.
Një ditë më herët, 33 njerëz u vranë nga një sulm tjetër izraelit në një shkollë të udhëhequr nga Kombet e Bashkuara, ku po strehoheshin familjet e zhvendosura palestineze.
Sulmet e fundit goditën kampet e refugjatëve Nuseirat dhe Maghazi, si dhe qytezat Deir al-Balah dhe Zawaiyda, sipas tyre.
Katër fëmijë dhe një grua janë në mesin e të vrarëve, përfshirë edhe kryetarin e komunës së Nuseiratit, sipas zyrtarëve spitalorë, raporton Associated Press.
Ushtria izraelite tha të premten se është duke i vazhduar operacionet në pjesë të Gazës qendrore. Ajo tha se trupat e saj i kanë vrarë dhjetëra militantë, kanë gjetur tunele dhe kanë shkatërruar infrastrukturë në atë zonë.
Izraeli është duke u përballur me një rritje të trysnisë ndërkombëtare për ta kufizuar gjakderdhjen e civilëve në luftën e tij kundër Hamasit – grupit të shpallur organizatë terroriste nga Shtetet e Bashkuara dhe Bashkimi Evropian.
Spanja ka njoftuar se do t’i kërkojë Gjykatës Ndërkombëtare Penale leje për t’iu bashkuar rastit të ngritur nga Afrika e Jugut, ku Izraeli akuzohet për gjenocid në Gazë.
Izraeli i mohon fuqishëm akuzat për gjenocid.
Më shumë se 36.000 palestinezë janë vrarë gjatë tetë muajve bombardime dhe sulme tokësore të Izraelit në Gazë, sipas Ministrisë së Shëndetësisë në enklavën palestineze, e cila udhëhiqet nga Hamasi.
Lufta e ka kufizuar dukshëm rrjedhën e ndihmave ushqimore, barnave dhe furnizimeve të tjera për palestinezët, të cilët po përballen me uri të madhe. Agjencitë e Kombeve të Bashkuara thonë se mbi 1 milion njerëz në Gazë mund të përjetojnë shkallën më të lartë të urisë kah mesi i korrikut.
Izraeli e nisi luftën pas sulmit të 7 tetorit nga Hamasi – pjesëtarët e të cilit u futën në jug të Izraelit dhe i vranë rreth 1.200 njerëz – kryesisht civilë – dhe i rrëmbyen 250 të tjerë.
Besohet se rreth 80 pengje të zëna më 7 tetor janë ende gjallë në Gazë.
