Kancelari gjerman, Olaf Scholz, bisedimet në takimet e së enjtes me kryeministrin e Kosovës, Albin Kurti dhe me presidentin e Serbisë, Aleksandër Vuçiq, nuk i ka konsideruar të dështuara.
Scholz, në një konferencë për media tha se në këto bisedime ka pasur përkushtim për zbatimin e marrëveshjeve bazë të Aneksit të Ohrit dhe për Asociacionin e komunave me shumicë serbe.
“Ishim në gjendje të ecim përpara. Mendoj se nëse bëjmë vlerësim politik, mund të ndaj vlerësimin tim se të dy, Kurti dhe Vuçiq, thanë që konceptin dhe propozimet konkrete, marrëveshjet Bazë dhe atë të Ohrit dhe Asociacionin e komunave me shumicë serbe, do t’i implementojnë. Këtë e kanë thënë qartë”, deklaroi Scholz.
I pyetur për sanksionet ndaj Kosovës dhe jo ndaj Serbisë, Scholz ka thënë se me rëndësi është se si të ndërtohet e ardhmja e mirë dhe paqësore për qytetarët në Kosovë dhe në Serbi.
