Sindikata e Bashkuar e Arsimit të hënën ka dorëzuar një peticion mbi 20 mijë nënshkrime, përmes të cilit kërkon ndryshimin e ligjit për skemat pensionale. Kjo pasi sipas tyre ky ligj nuk u njeh si vitie kontribut dhënëse, përvojën e mësuesve që punuan në vitet e 90-ta.
Për 42 vite rresht ditarin e mësuesit nuk e lëshoi nga dora.
Asllan Qyqalla këtë mision të shenjtë e kreu edhe në kohët më të vështira.
Para nxënësve në krye të detyrës, ai qëndroi edhe gjatë viteve të 90-ta, atëherë kur arsimi ishte kthyer në ilegalitet nga shteti i Serbisë.
Përkrah gjithë këtij rrugëtimi, puna në sistemin e arsimit nuk ishte aspak e lehtë.
“Përpos torturave, rrahjeve, brutalitetit po e përmendi vetem shkarazi, dëftesat të cilat na i zinin me Republikë të Kosovës unë si drejtor që isha me kanë detyruar që të gllabëroj për goje dhe me thotë urdhëro haje Republikën e Kosovës. Kështu që ne Republikën e Kosovës e jetësuam në qytet, fshat e jetësuam”, tha ai.
Puna e vështirë nganjëherë edhe duke ia rrezikuar jetën Qyqallës, mund të mbetet vetëm kujtim i së kaluarës për sakrificën për arsim.
Pasi me ligjin e ri për skemat pensionale, Qyqallës nuk i njihen vite përvojë ose stazh pune mësimdhënia gjatë viteve 90-ta.
Për këtë, profesori i cili është në prag të pensionimit shprehet i zhgënjyer.
“Ne tash po ballafaqohemi me problemin tjetër, që nuk na njohin përvojën e punës, ne ishim 10 vjet të sfiduar prej të gjitha lirive të njeriut dhe të torturua, tash jemi te sfiduar prej Qeverive tona. Unë nuk e di ka polli ky ligj kështu që nuk e njeh të drejtën legjitime të mësimdhënësit derisa ekzistojnë ditarët”, u shpreh ky mësimdhënës.
E që ky ligj të ndryshojë, Sindikata e Bashkuar e Arsimit të hënën në Kuvendin e Kosovës e dorëzoi peticionin me mbi 20 mijë nënshkrime.
“Krejt kjo po bëhet që ta kthejmë të drejtën e fituar neni 8 pika gjashtë e cila në ligjin bazik, punëtorëve të arsimit që kanë punuar në vitet e 90ua njihte këto vite si kontribut dhënëse dhe iu ndihmonte shume për ta marrë pensionin e plotë të punës. Poashtu kemi bërë këtë nisme që viti 2000- 2001 e deri të trusti pensional të njihen si vite kontribut dhënëse sepse Kosova në atë kohë ka qenë nën administrimin e UNIMIK-ut, dhe nuk kanë faj punëtorët”, tha kreu i SBASHK-ut, Rrahman Jasharaj.
Në rast se kjo nismë ka sukses, juristë, Anton Nrecaj, tregon procedurat ligjore dhe rrugën që duhet ta ndjekë kuvendi.
“Fillimisht është komisioni i cili brenda për brenda Kuvendit i cili do ta marr parasysh këtë kërkesë, të verifikojë ato nënshkrime se a janë të bazuara, pastaj fillon trajtimi i asaj kërkesë dhe dispozitave ligjore të cilin e ka propozuar SBASHK-u. Duhet të shkojë në lexim të pare në lexim të dytë varësisht varet prej vullnetit të deputeteve që këtë kërkesë për ndryshim të ligjit ta aprovojë apo jo. Po flas nga eksperienca neve na është dashtë katër vite që të ajo kërkese të kaloj në Kuvend”, shprehet Ndrecaj.
Në korrik të vitit 2023, ishte votuar ligji i ri për skemat pensionale, duke krijuar një skemë të re për personat që nuk e kishin plotësuar kriterin prej 15 vjetësh stazh për të përfituar nga pensioni kontribut-pagues
