Me 4 dhjetor Sindikata e Bashkuar e Arsimit pritet të mbaj protestë para MASHTI-it dhe Qeverisë së Kosovës. Kërkesa e tyre është rritja e pagave dhe nisja e negociatave për kontratën kolektive. Me kontratën kolektive po kanë probleme edhe komunat në Kosovë madje këtë muaj 10 nga to rrezikojnë që të mos kenë mjete për të paguar shërbyesit civil.
Pas disa muajve, Sindikata e Bashkuar e Arsimit pritet të i rikthehet veprimeve sindikale.
Me 4 dhjetor, SBASHK do të mbaj protestë para Ministrisë së Arsimit e Qeverisë së Kosovës.
E nuk përjashtohet mundësia edhe e grevës në rast që kërkesat e tyre nuk plotësohen.
Një nga arsyet e kësaj proteste është çështja e pagës.
“Ngritja eventuale 55 euro nuk ndryshon asgjë në jetesën e punëtorëve të arsimit dhe të gjithë sektorëve të tjerë. Edhe është e vogël edhe është mashtrim dhe prandaj e kemi një arsye shtesë”, shprehet kryetari i SBASHK-ut, Rrahman Jashari.
Madje ata do të kërkojnë edhe negocimin e kontratës se re kolektive të cilën ani pse e kanë dorëzuar në tetor, ende nuk kanë marrë asnjë përgjigje.
“Arsyeja është kontrata kolektive pasi me ligjin e punës çdo tri vite sektorët duhet të nënshkruajnë kontrata të reja. Ne me kohë e kemi përgatit që në korrik e kemi biseduar me zëvendësministrin Kelmendi ja kemi treguar që jemi në përgatitje ja kemi dërguar me kohë draftin e kemi lëshuar në diskutim publik me 2 tetor ja kemi dërguar fizikisht me 3 tetor ja kemi dërguar në mënyrë elektronike por që nga ajo kohë nuk kemi asnjë ftese”, shprehet kreu i SBASHK-ut.
Me kontratën kolektive po kanë problem edhe komunat në Kosovë.
Drejtori i Asociacionit të Komunave të Kosovës, Sazan Ibrahimi thotë se edhe në buxhetin e vitit 2025 është paraparë që komunave t’ iu merren mjetet.
“Vitin e ardhshëm kemi kërkuar edhe nga Parlamenti i Republikës së Kosovës që të parashihet një vijë buxhetore, mirëpo ata nuk e kanë parapa atë vijë buxhetore dhe avazi i vjetër që ka ndodh duke ia marrë mjetet komunave do të duhet të vazhdoj edhe vitin e ardhshëm”, thotë Ibrahimi.
Madje në muajin nëntor, sipas drejtorit të AKK-së, 10 komuna nuk do të mund të bëjnë pagesat për shërbyesit civil. E ky numër pritet të rritet në muajin dhjetor.
“Nëse përgjegjësia ligjore e cila i takon Qeverisë së Republikës së Kosovës për ti mbuluar shpenzimet për paga nuk mbulohet nga niveli Qendror atëherë janë mbi 10 komuna që nuk mund të realizojnë pagat për shërbyesit civil në komunat përkatëse në muajin nëntor e në muajin dhjetor nëse Qeveria nuk kujdeset për këtë aspekt ligjor atëherë do të mbesin mbi 25 komuna pa paga për zyrtarë publik”, shprehet ai.
Sipas Asociacionit të Komunave të Kosovës, nga pagesat e kontratës kolektive, komunave iu kanë marrë 63 milionë euro të cilat kanë qenë të dedikuar për investime kapitale.
