Satelitët aktualisht nuk e kanë asnjë funksion.
Si sistem i vjetër i transmetimit ata janë ende të vendosura në disa objekte banimi në kryeqytet, përkundër thirrjeve nga Komuna që ato të largohen.
Mosbindja e kësaj nga ana e qytetarëve, nuk e ka ndonjë arsye konkrete, por vetëm si çështje e lënë anash.
“Kemi një satelit te banesa dhe faktikisht e kemi lënë vetëm se s’kemi mujt me hjek, kemi pritu me hjek. Ka edhe satelitë tjerë aty. Ata s’janë të mirë me i pa kush, as s’janë të mirë për rrufepritës, por kanë mbetë ashtu. Pasi që ka ardhë interneti në shtëpi nuk janë të nevojshëm më, kanë qenë të nevojshëm në kohën e okupimit serb”, tha Hysen Zenuni – qytetar.
Prezenca e tyre në rrugë të ndryshme të kryeqytetit, vlerësohet se parasheh edhe rrezik për këmbësorët, për çka u kërkua intervenimi komunal.
“Nëse nuk i largojnë me dëshirë duhet inspeksioni me vepru, sepse qytetari është duke kalu dhe mundet me i ra në kokë dhe me lëndu, jo vetëm mua por këdo që kalon. Në këtë rast inspeksioni duhet me vepru. Nuk i largojnë me dëshirë, duhet me gjoba, por gjithqysh duhet me i largu, se është edhe shëmtim i qytetit, sepse ka kalu koha e satelitëve”, tha një tjetër qytetar – Nysret Azemi.
Nga Drejtoria për Shërbime Publike të komunës së Prishtinës, nuk kanë kthyer përgjigje për veprimet dhe mosveprimet rreth prezencës së këtyre satelitëve.
Për heqjen e tyre, kjo komunë në vitin 2022 u kishte dhënë afat qytetarëve që brenda 90 ditëve t’i largojnë ose në të kundërtën do të intervenojnë vet, por një gjë e tillë nuk kishte ndodhur.
E paraprakisht, ka qenë në fuqi vendimi që i detyronte qytetarët të paguanin për mbajtjen e satelitëve.
