Portierit të Kombëtares së Kosovës, Arijanet Muriq i kanë mjaftuar 5 paraqitje në Serie A për ta bindur skuadrën e Sassuolos në blerjen e kartonit të tij.
Mediumet në Itali kanë njoftuar se te Sassuolo kanë marrë vendim për ta shfrytëzuar opsionin e blerjes së Muriqit, të cilin e kanë huazuar nga Ipswich Towni para fillimit të këtij sezoni.
Bëhet e ditur se Sassuolo ka njoftuar ekipin anglez, me të cilin po negocion për të ulur çmimin e kartonit të portierit Muriq që ka një vlerë prej 10 milionë eurosh.
Marrëveshja ka gjasa të arrihet mes klubeve, pasi edhe te Ipsëichi janë të gatshëm ta shesin 26-vjeçarin, me të cilin kanë kontratë deri në vitin 2028.
Sassuolo është gati të paguajë deri në 7 milionë euro për ta bërë Muriqin transferim të përhershëm pasi po e vlerëson si portier për periudhë afatgjate.
Muriq nuk ka shkëlqyer këtë sezon vetëm te Sassuolo, por edhe te Kombëtarja e Kosovës ku në tri ndeshjet e fundit kualifikuese për Botërorin 2026 nuk ka pranuar asnjë gol.
