Tirana mirëpriti edhe një tjetër Samit të rëndësishëm.
Në kryeqytetin shqiptar u organizua takimi i Ministrave të Jashtëm në kuadër të Procesit të Bashkëpunimit të Evropës Juglindore (SEECP).
Fokusi ishte tek rruga e integrimit për në Unionin Evropian nga vendet aspiruese të Evropës Juglindore.
Në këtë samit Kosovën e përfaqësoi Ministrja e Jashtme në detyrë, Donika Gërvalla, e cila përmes një postimi në rrjetin social facebook, tha se Kosova është e palëkundur për intregimin euroatlantik ndërsa ngriti disa shqetësime për rolin destabilizues të Serbisë në rajon.
“Sulmi i 24 shtatorit në Banjskë, i kryer nga një grup paramilitar i organizuar, financuar dhe trajnuar nga shteti serb, përbën akt të hapur agresioni ndaj Republikës së Kosovës dhe kërcënim serioz për paqen në rajon. Po ashtu, sulmi i fundit në kanalin Ibër-Lepenc përbën goditje të rëndë ndaj infrastrukturës kritike të vendit. Përveç kësaj, dënova ashpër arrestimin e ish-zyrtarit të Policisë së Kosovës, Arbnor Spahiu, nga autoritetet serbe, që konfirmon faktin që shteti serb qëndron pas sulmit të Banjskës” , tha Gërvalla
Ministri i Jashtëm i Shqipërisë, Igli Hasani, para homologëve tha se bashkëpunimi rajonal është përmirësuar dukshëm në vitet e fundit.
“Këtu e kemi zërin të gjithë të barabartë ku vizioni ynë për rajonin merr formë. Në fakt gjatë viteve të fundit bashkëpunimi i jonë është bërë më strategjik dhe më i harmonizuar me politikat e BE-së përfshi planin ekonomik te investimeve dhe agjendën e gjelbër për Ballkanin Perëndimor. Shqipëria ka qenë një anëtare e përkushtuar e këtij procesi”, tha Hasnai.
Tutje, shefi i diplomacisë shqiptare shtoi se janë duke bërë gjithçka që përpara fundit të kësaj dekade ta anëtarësojnë Shqipërinë në familjen e madhe evropiane.
“Synimi ynë është ambiciozë, por unë mendoj edhe i arritshëm për të hapur të gjithë grup-kapitujt deri në fund të këtij viti, dhe të përmbyllim negociatat deri në fund të vitit 2027. Po punojmë me vendosmëri për ta bërë Shqipërinë gati për anëtarësim të plotë në BE përpara fundit të kësaj dekade”, u shpreh diplomati shqiptar
Procesi i Bashkëpunimit në Evropën Juglindore është një forum i rëndësishëm politik që synon dialogun dhe bashkëpunimin në Evropën Juglindore, i cili përmbyll një vit të suksesshëm të Presidencës Shqiptare nën moton “Formësojmë të ardhmen tonë evropiane”, tha ai.
