Zëvendësministri i Drejtësisë, Blerim Sallahu ka reaguar pas vendimit të Gjykatës Supreme për të hedhur poshtë si të palejuar ankesën e Lëvizjes Vetëvendosje të paraqitur kundër vendimit të Panelit Zgjedhor për Ankesa dhe Parashtresa (PZAP) lidhur me certifikimin e Listës Serbe për zgjedhjet parlamentare
Sipas Sallahut Gjykata Supreme i ka hapur rrugë për të qenë pjesë e Kuvendit të Kosovës një subjekti politik antikushtetues dhe mbështetës të parezervë të veprimeve terroriste.
Ai ka shtuar se ankesa e Lëvizjes Vetëvendosje është hedhur poshtë për shkaqe procedurale për të cilat siç ka thënë ai ishin të vetëdijshëm por që sipas tij është dashur që mbrojtja e sigurisë nacionale shtetërore t’i mbivendoset pengesave procedurale.
“Sot e kemi pranuar Aktvendimin Gjykatës Supreme me të cilin është hedhur poshtë ankesa e Lëvizjes VETËVENDOSJE! për shkaqe procedurale. Ne kemi qenë të vetëdijshëm për pengesat procedurale, por për shkak të veprimeve të vazhdueshme antikushtetuese dhe antiligjore, në mbrojtje të akteve terroriste, me të cilin është cënuar seriozisht siguria e shtetit ishte dashur që mbrojtja e sigurisë nacionale shtetërore t’i mbivendoset pengesave procedurale dhe kësisoj ankesa jonë të ishte shqyrtuar në mënyrë meritore dhe kështu t’i ndalohej Listes Serbe të marrë pjesë në zgjedhjet parlamentare 2025. Gjykata Supreme i ka hapur rrugë një subjekti politik antikushtetues dhe mbështetës i parezervë i veprimeve terroriste të jetë pjesë e Kuvendit të Kosovës. Pse po duan ta lejojnë certifikimin e Listës Serbe me patjetër? Dhe në këto momente tepër vendimtare për vendin përgjegjësinë e këtij certifikimi skandaloz për partinë e Radojçiqit do ta mbajë sistemi gjyqësor dhe opozita. Të dyja po shpalosen si pjesë përkrahëse të Listes serbe në një formë apo formën tjeter”, ka shkruar Sallahu në Facebook.
Gjykata Supreme ka njoftuar se me 30 dhjetor ka marrë vendim me të cilin e ka hedhur poshtë si të palejuar ankesën e Lëvizjes Vetëvendosje të paraqitur kundër vendimit të Panelit Zgjedhor për Ankesa dhe Parashtresa (PZAP) lidhur me certifikimin e Listës Serbe për zgjedhjet parlamentare./teve1.info/
