Gjykatësja Mapi Feld-Folia, tha se Mustafa lirohet nga dënimi për pikën 2-trajtim mizor i të ndaluarve.
Sipas gjyqtares Mapi Feld-Folia, Salih Mustafa shpallet fajtor dhe dënohet me 10 vite burgim për pikën një të aktakuzës, krime të luftës, dënohet me 22 vite burgim për pikën 3 të aktakuzës-torturë ndaj 6 personave të ndaluar në kompleksin në fshatin Zallash të Prishtinës, 25 vite burgim për pikën 4-vrasje e paligjshme, derisa u lirua nga aktakuza për pikën 2-trajtim mizor i të ndaluarve.
“Në emër të popullit të Kosovës, për arsyet e shtjelluara në aktgjykim dhe duke marrë parasysh provat dhe argumentet, trupi gjykues në emër ët popullit të Kosovës ju shpallë fajtor për pikën 3-torturë si krim lufte. Pikën 1-ndalim arbitrar. Pikën 4-vrasje e paligjshme. Të pafajshëm ju shpallë për krimin e luftë së trajtimit mizor për pikën 2. Trupi gjykues iu shpallë fajtor për më shumë se 1 vepër penale. Dënim me 10 vite burg për krime të luftës-pika 1. Dënim me 22 vjet për torturë, pika 3. Dënim me 25 vite burgim për vrasjen e paligjshme. Me vendim të njësuar ju shpall fajtor me 26 vjet burgim në të cilën llogaritet koha e kaluar në paraburgim”, tha ajo.
Gjykatësja tha se dënimi është individual dhe nuk ka të bëjë me luftën e UÇK-së ose popullin e Kosovës.
Sipas aktakuzës ndaj Salih Mustafës, të ngritur nga Dhimat e Specializuara në Hagë, Prokurori i Specializuar e akuzon Salih Mustafën për përgjegjësi penale individuale dhe përgjegjësi penale si epror për krimet e kryera nga disa anëtarë të UÇK-së kundër personave të ndaluar në kompleksin e ndalimit në Zllash, në rajonin Gollak të Kosovës.
Sipas aktakuzës, afërsisht midis 1 prillit 1999 dhe rreth fundit të prillit 1999, Salih Mustafa dhe disa ushtarë, policë e roja të UÇK-së patën të njëjtin qëllim të përbashkët të marrjes në pyetje dhe keqtrajtimit të të ndaluarve në kompleksin e ndalimit në Zllash dhe qëllimi i përbashkët përfshinte krimet e specifikuara si në vijim.
Mustafa u dënua për tri nga katër aktakuzat për krime lufte që ngarkohej:
Ndalim arbitrar (Pika 1)
Torturë (Pika 3) dhe
Vrasje e paligjshme (Pika 4). derisa u shpall i pafajshëm për pikën 2-Trajtim mizor.
Salih Mustafa u arrestua dhe u transferua në objektin e paraburgimit të Dhomave të Specializuara në Hagë, më 24 shtator 2020.
Më 28 shtator 2020, bëri paraqitjen e parë para Gjykatësit të Procedurës Paraprake, Nikola Giju. Në paraqitjen e mëtejshme më 28 tetor 2020, Mustafa u vetëdeklarua i pafajshëm në lidhje me të gjitha akuzat e paraqitura në aktakuzë.
Palët, Zyra e Prokurorit të Specializuar (ZPS) dhe Mbrojtja dorëzuan (në mënyrë konfidenciale) versionet më të fundit të dosjeve paraprake, përkatësisht më 22 shkurt dhe 6 maj 2021. Më 7 maj 2021, Gjykatësi i Procedurës Paraprake ia kaloi dosjen e çështjes Trupit Gjykues I.
Tetë viktima morën pjesë në procesin gjyqësor si një grup i vetëm dhe u përfaqësuan në sallën e gjyqit nga mbrojtësja e viktimave.
Gjykimi filloi më 15 shtator 2021 me deklaratat hyrëse të Prokurorit të Specializuar dhe mbrojtëses së viktimave. ZPS-ja thirri 14 dëshmitarë dhe më 4 shkurt 2022 mbylli paraqitjen e provave të veta.
Më 23 shkurt 2022, Trupi Gjykues hodhi poshtë mocionin e Mbrojtjes për rrëzimin e akuzave kundër të akuzuarit në bazë të rregullës 130 të Rregullores së Procedurës dhe Provave të DHSK-së.
Më 21 mars paraqiti prova mbrojtësja e viktimave, kur një nga viktimat pjesëmarrëse në çështjen gjyqësore i shprehu pikëpamjet dhe shqetësimet Trupit Gjykues.
Më 22 mars 2022, Mbrojtja filloi paraqitjen e provave të veta dhe thirri 15 dëshmitarë për të dhënë dëshmi. Më 22 maj 2022 Mbrojtja njoftoi mbylljen zyrtare të paraqitjes së provave të veta.
Më 1 qershor 2022, ZPS-ja paraqiti kundërprova, ku thirri një dëshmitar dhe paraqiti prova shkresore shtesë.
Më 3 qershor 2022, Trupi Gjykues kërkoi prova shtesë në bazë të rregullës 132 të Rregullores, konkretisht dy aktekspertiza lidhur me vlerësimin mjekësor të disa prej viktimave të pranuara në këtë çështje gjyqësore.
Më 20 qershor 2022 u mbyll procedura e paraqitjes së provave në këtë çështje gjyqësore. Palët dorëzuan dosjet gjyqësore përfundimtare përkatësisht më 21 dhe 22 korrik 2022.
Deklaratat përmbyllëse të ZPS-së, mbrojtëses së viktimave dhe Mbrojtjes u mbajtën më 13 deri më 15 shtator 2022.
