Mbrojtësi francez William Saliba ka zbuluar se interesimi nga Real Madrid ishte “joshës”, por thekson se nuk ka hezituar asnjë moment për të rinovuar me Arsenalin.
Saliba, i cili kishte hyrë në dy vitet e fundit të kontratës së tij të mëparshme, ishte kthyer në një shënjestër kryesore për Real Madridin, që kërkonte ta transferonte falas në verën e ardhshme.
Megjithatë, nënshkrimi i kontratës së re pesëvjeçare në shtator i dha fund menjëherë çdo spekulimi. 23-vjeçari kishte shprehur publikisht dëshirën për të qëndruar në “Emirates”, duke theksuar synimin për të fituar trofe madhorë me Arsenalin përpara çdo aventure të re në të ardhmen.
Në një intervistë për “Telefoot”, Saliba pranoi se interesimi nga “Los Blancos” i kishte dhënë arsye për të reflektuar.
“Sigurisht, është gjithmonë joshëse kur një klub si Real Madrid të kërkon. Por për mua, dëshira ishte e qartë – të qëndroja te Arsenali. Dua të fitoj trofe këtu përpara se të mendoj për ndonjë gjë tjetër”.
I pyetur nëse do të mund të bashkohej me bashkëkombësin e tij nga Bondy, Kylian Mbappe, te Real Madrid në të ardhmen, Saliba qeshi dhe u përgjigj:
“Jo, jo, lidhja e Bondy është vetëm me kombëtaren franceze, për momentin”.
Pas rinovimeve të Salibas dhe Gabriel Magalhaes, Arsenali duket i sigurt në qendër të mbrojtjes për shumë vite.
Në anën tjetër, Real Madrid vazhdon të kërkojë përforcime në atë repart, me David Alaba dhe Antonio Rudiger që mund të largohen në verën e ardhshme.
Sipas raporteve, madrilenët po fokusohen kryesisht te transferimet e lira, me emra si Marc Guehi (Crystal Palace), Ibrahima Konate (Liverpool) dhe Dayot Upamecano (Bayern Munich) që janë në listën e tyre të mundshme
