Inxhinieri i teknologjisë, Ermal Sadiku, në emisionin “ResPublika” ka folur për rëndësinë e Web3 dhe ndikimin e tij në të ardhmen.
Sadiku ka thënë se Web3 është një vegël që ka me pas mundësi me hy në internet dhe me pas qasje në produktivitet.
“Qasja në informata, qasja në njohuri dhe qasja në produktivitet janë gjërat që më së miri e përshkruajnë ChatGPT Web3. Web3 është që ty kanë me të dhënë mundësi që kur të hysh në internet me pas produktivitet prej dikujt”, ka thënë ai në Tëvë1.
Njohësi i çështjeve teknologjike ka marrë shembull se si Web3 ndihmon në hapjen, mbajtjen dhe rritjen e një biznesi.
“Nëse po dëshiron me hap një biznes, p.sh me shit lule online, tash ki me pas një mundësi që me i thënë veglës hyn në internet edhe me bë një research se çfarë lule me i shit Kosovës, ku me çel dyqanin, ku ka më së shumti ka lëvizshmëri te njerëzve, sa janë qiratë në Prishtinë, ku me u furnizua, qysh janë depot, cilat lule shkojnë më shumë, cilat janë blerë më shumë në pesë vitet e fundit, si dhe me ta ndërtua një E-Commerce. Pra ki qasje në produktivitet, kur ki qasje në produktivitet qielli është limiti se çka ke mundësi me bë”, ka shpjeguar Sadiku.
Sipas Sadikut, Web3 përveç që të mëson diçka të re, ai edhe mbledh informata.
“Ideja e Web3 është që ti me pas qasje në diçka që të kryen punë, pos që të mëson edhe të mbledh informata” .
Inxhinieri i teknologjisë ka thënë se qytetarët e Kosovës kanë me pas mangësi në të dhëna, si dhe në përfshirje të informatave, derisa vendi vazhdon të ketë probleme politike.
“Përderisa nuk i përfundojmë problemet politike, tash kemi problem me na njoft Google, Apple, Microsoft, kemi me pas problem me u përfshi në informata, po shpresoj që një pjesë e qeverisë ka me marrë përsipër që me punu. Pra, deri në përfundim të problemeve politike të dhënat tona në Kosovë kanë me qenë të mangshme në OpenAI”, tha përfund ai.
