Zëvendëskryesuesi i Kuvendit Komunal të Mitrovicës së Veriut, Skënder Sadiku, e ka vlerësuar hap të mirë dhe thyerje akulli pjesëmarrjen e serbëve, edhe pse të paktë në numër, në takimin e mbajtur në mes krerëve të Mitrovicës së Veriut dhe qytetarëve të komunitetit shqipëtarë dhe serbë për hapjen e Urës së Ibrit.
Sadiku, konsideron se komunikime të tilla duhet të ketë në baza ditore, në mënyrë që të gjendet zgjidhje sa më lehtë për brengat e secilit.
“Është hap i mirë, ishin nga subjekti opozitar nga Demokracia Serbe, pjestarë të asaj partie. Kishte edhe nga shoqëria civile që është mirë, ndoshta pak në numër por ndoshta të them kështu kushtimisht ishin të përzgjedhur por është thyer akulli. Mirëpo definitivisht është mesazh dhe një e mirë që duhet, duhet në baza ditore të kemi komunikime që edhe më lehtë të gjejmë zgjidhje por edhe t’i shohim kushtimisht brengat prej dorës së parë”, ka thënë ai në emisionin “Ditari” në Tëvë1.
Tutje, ai është shprehur se tash duhet të punohet në bindjen e komunitetit serb se hapja e urës është në interesin e tyre, si dhe në bindjen e ndërkombëtarëve se me këtë veprim janë duke u mbrojtur të drejtat e lirisë së lëvizjes.
“Ne tash mendoj se duhet të punojmë fort në terren, por edhe të përçojmë mesazhe te komuniteti serb që hapja e urës është në interes të tyre, por edhe te komuniteti ndërkombëtar, që ne jemi duke mbrojtur vlerat universale, drejtën e lirisë, jemi duke mbrojtur edhe vlerat europiane, civilizuese se lëvizja është e lirë”, ka shtuar Sadiku.
