Sadiku në emisionin “Ditari” tha se mesazhi kryesor i kryediplomatit austriak ka qenë liberalizimi i vizave. Ai tha se përveç liberalizimit, mbështetja nga Austria nuk mungon as në fusha tjera.
“Natyrisht që mbështetja e Kosovës nga shteti austriak nuk mungon në asnjë fushë për shkak se është një shtet mik i Kosovës në të gjitha aspektet dhe është shtet aleat i Gjermanisë. Kryesisht këto shtetet gjermanofolëse dhe pjesa e Zvicrës kanë një politikë të përbashkët karshi Ballkanit Perëndimor dhe Kosovës”, tha Sadiku.
Ai më tej tha se porosi tjetër e kryediplomatit austriak duhet të ketë qenë edhe vazhdimi i dialogut Kosovë-Serbi.
“Njëkohësisht vazhdimi i dialogut me Serbinë sigurisht ka qenë një mesazh që edhe kësaj radhe mund të jetë diskutuar në tryezën e bisedimeve me kryeministrin Kurti, me ministrin e Punëve të Jashtme, Donika Gërvalla dhe presidenten Vjosa Osmani. Mendoj që karshi liberalizimit të vizave është sigurisht që edhe shtytja e dialogut dhe kërkesa për të vazhduar Kosova me hapa konkret dhe pragmatik drejt zgjidhjes përfundimtare të statusit ose mos marrëveshjes së saj politike me Serbinë do të jetë i paalternativë në të ardhmen e shkurtër”, shtoi ai në Tëvë1.
Kryediplomati Schallenberg gjatë ditës u takua me presidenten Vjosa Osmani, kryeministrin Albin Kurti, kryetarin e Kuvendit, Glauk Konjufcën dhe ministren e Jashtme Donika Gërvalla. /teve1.info./