Festave të fundvitit, rëndësi i kushtojnë edhe institucionet publike.
Qoftë me dekore të hapësirave të tyre apo me dhurata për fëmijë të kategorive të ndryshme.
Institucioni i Presidencës, ka ndarë para për ndriçimin dhe dekorimin e oborrit dhe hapësirave të saj, për festat e fundvitit.
Dyfishin e parave, mbi 12 mijë euro, bleu dhurata për festat e fundvitit, për fëmijët e SOS Fshatit, Doën Syndrome Kosova, fëmijët me autizëm, shtëpitë e të moshuarve, strehimoret për mbrojtje të grave dhe fëmijëve si dhe grupet tjera.
Shumë të përafërt ndau edhe Ministria për Komunitete dhe Kthim.
Me afro dhjetë mijë euro, planifikohet blerja e dhuratave për fëmijët e komuniteteve jo shumicë.
Për qëllim të njëjtë, një shumë nga buxheti e ndau edhe Ministria e Shëndetësisë.
Fëmijëve të Klinikave të QKUK-së, u bleu dhurata për festa të fundvitit, që i kushtuan mbi 1 mijë euro.
Të pakategorizuar janë fëmijët që do të marrin dhurata nga Policia e Kosovës.
Për këto janë destinuar 2 mijë e 550 euro.
Ministria në kuadër të së cilës hynë edhe Policia e Kosovës, ajo e Punëve të Brendshme, afro 1 mijë euro i ka ndarë për dhurata për festat e fundvitit.
Disa ministri janë kufizuar vetëm në dekorime të hapësirave të tyre.
Nën vlerën e 1 mijë eurove, për dekor shpenzuan Ministria e Punëve të Jashtme dhe ajo e Arsimit.
