Në fund të nëntorit, në veri të vendit ndodhi një sulm i cili u cilësua si terrorist.
Kanali i Ibër Lepencit u dëmtua, me ç’rast u godit infrastruktura kritike kur për disa ditë pati mungesë të ujit e rrezik për mungesë të energjisë elektrike.
E pas katër muajsh, ende nuk është bërë e ditur se deri ku kanë arritur hetimet për këtë sulm, ndonëse janë arrestuar dy persona.
Ish-kryeprokurori Sylë Hoxha tregon se hetimet për raste të kësaj natyre, marrin kohë për shkak se duhet edhe ekspertiza jashtë vendit.
“Pastaj të mbledhë fakte, argumente, tjera të dëgjojë dëshmitarë e kështu me radhë. Kështu që kjo çështje është mjaft komplekse pa dashtë me dhënë ndonjë arsye por po them se profesionalisht i merr kohë kjo, natyra e këtyre veprave është e rëndë dhe sigurisht që shfaqen edhe vështirësi gjatë grumbullimit të provave”, tha Hoxha.
Ai thotë se angazhimi i FBI në këtë proces, ka ndikuar pozitivisht.
“Konsideroj se edhe ata e kanë dhënë ndihmën e tyre profesionale dhe unë e konsideroj si ndihmë të mirëseardhur për Prokurorinë e Shtetit të Kosovës sepse ata janë më të njohur e kanë edhe përvojën, kanë edhe teknika dhe kështu që sigurisht kanë me ndihmu zbardhjen e këtij rasti”, tha ai.
Kurse ish-shefi i hetimeve në Policinë e Kosovës, Rrahman Sylejmani tregon se hetimi i këtyre rasteve të ndjeshme merr kohë të gjatë.
“Besoj se shumë tentativa dhe përpjekje sikurse edhe për rastin e Banjskës nuk kanë me mujt me pasë qasje edhe te tjerët sepse ata kanë ikë përveç këtyre këtu nëse kanë ndonjë element apo ndonjë informatë që me arrest edhe dikë tjetër që me qenë më shumë se dy të arrestuar. Por ato veprime përveç ekzaminimeve që ndoshta marrin atë kohë, po besoj që në pesë – gjashtë muajt e ardhshëm maksimum një vit ishte dashtë me u përmbyllë ky rast sepse ata që janë të qasshëm janë ato prava do të ekzaminohen dhe ekspertizat”, tha Sylejmani.
Tëvë1 ka kërkuar informacione nga Prokuroria Speciale lidhur me rrjedhën e hetimeve të këtij rasti, por që deri në publikimin e kronikës nuk ka pasur përgjigje.
