Më shumë veprime nga ana e institucioneve të sigurisë, po kërkohen me theks të veçantë në kryeqytetit, pas incidenteve të fundit me armë zjarri. Metodat e bllokimit të rrugëve, shihen me efekt pozitiv në zbardhjen e rasteve.
Është njëra ndër lagjet më të përfolura ditëve të fundit.
Gjendja duket e qetë, të mërkurën në Aktash, që për dy ditë rresht ishte vendi i dy incidenteve me armë zjarri, ku pati edhe viktima.
Lëvizjet në këtë pjesë janë të pakta.
E që incidente të tilla të ndodhin qendër të kryeqytetit, konform numrit të policëve që janë në detyrë, po vlerësohet si e habitshme.
“Kjo është me të vërtetë e dhimbshme, sepse po ndodh diçka midis kryeqytetit të Kosovës, që është për t’u habitur. Pse po ndodh kjo? Unë po them, se na tash duhet me qenë më vigjilent dhe me një siguri shumë më të madhe sepse edhe e kemi numrin e madh të policëve, mbi nëntë mijë policë i ka Kosova”, tha eksperti i sigurisë, Hajrullah Tërnava.
Në kuadër të veprimeve policore për këto incidente, Policia e Kosovës aktivizoi “Unazën e Çeliktë”, efekti i së cilës konsiderohet se është në dobi të zbardhjes së rasteve kriminale.
“Kjo do të thotë se në të gjitha rrugët hyrjet dhe daljet e qytetit janë të kontrolluara. Shtohen patrulla të Policisë brenda qytetit, në mënyrë që të identifikohen kryerësit e asaj vepre penale ose të kapen kryerësit e veprës penale. Në këto kontrolle, në hyrje – dalje, ndodh që të kapen edhe ndonjë armë apo pajisje e palejueshme”, tha ish-nënkoloneli i policisë, Refki Morina.
Për pesë të përfshirët në përleshjen e armatosur të së dielës në “Aktash”, u është caktuar masa e paraburgimit prej një muaj.
