Katër muaj para zgjedhjeve,Qeveria Kurti ka vendosur që të i rrisë për 20% pensionet. Shefi i ekzekutivit, Albin Kurti ka thënë se kjo rritje do të jetë prej tetorit për pensionin bazik të moshës dhe kategoritë e tjera ndërsa nga janari do të ketë rritje për pensionet e përcaktuar me ligj për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave të dhunës seksuale të luftës, viktimave civile dhe familjeve të tyre.
Të hënën thirri konferencë për media.
E shefi i Qeverisë, Albin Kurti aty tha se ka një lajm të mirë për pensionistët.
Katër muaj para zgjedhjeve nacionale në vend, ekzekutivi i ka rritur për 20% pensionet për disa kategori.
“Nga ky muaj, do të rrisim për 20 për qind të gjitha pensionet si në vijim: Pensionin bazik i moshës, kontibutpagues i plotë dhe parcial, pensioni i aftësisë së kufizuar për fëmijë dhe për të rritur, pensioni për personat e verbër, për personat paraplegjikë dhe tetraplegjikë, familjar, invalidor i punës dhe pensioni i parakohshëm për punëtorët e Trepçës”, tha Kurti.
Mirëpo, sipas tij kjo nuk është rritja e vetme për pensionistët.
Nga janari i vitit 2025-të do të ketë rritje edhe për disa kategori të tjera.
Detaje për këtë rritje dha edhe ministri i Financave, Hekuran Murati.
Nga kjo rritje prej 20%, pensioni bazik i moshës do të jetë nga 100 në 120 euro.
