Në një edicion të posaçëm të emisionit Conflict Zone të Deutsche Ëelle, transmetuar nga Forumi Ekonomik Botëror në Davos të Zvicrës, Sekretari i Përgjithshëm i NATO-s, Mark Rutte, foli për sigurinë evropiane, rolin e SHBA-ve dhe të ardhmen e aleancës transatlantike.
I pyetur nëse aleatët evropianë të NATO-s janë peng i kërkesave të Trump, Rutte theksoi se NATO është jetike jo vetëm për mbrojtjen e Evropës, por edhe për sigurinë e Shteteve të Bashkuara.
“Që Shtetet e Bashkuara të jenë të sigurta, duhet një Arktik i sigurt, një Atlantik i sigurt dhe një Evropë e sigurt”, tha ai, duke shtuar se Evropa është e sigurt falë përpjekjeve të veta brenda NATO-s dhe marrëdhënies së fortë transatlantike.
Duke folur për për çështjen e Grenlandës dhe pretendimet e Trump se ka rrezik sigurie, Rutte u shpreh se shqetësimet e Trump janë të drejta, duke theksuar rritjen e aktivitetit të Kinës dhe Rusisë dhe hapjen e rrugëve detare.
Ai vuri në dukje se shtatë nga tetë vendet që kufizohen me Arktikun janë anëtare të NATO-s, ndërsa vetëm Rusia është jashtë aleancës.
Rutte pranoi se qëndrimi i Trump ka ushtruar presion mbi Evropën për të rritur investimet në mbrojtje.
“Mund të jeni të kënaqur që ai është aty, sepse na ka detyruar ne në Evropë të rrisim angazhimin dhe të marrim më shumë përgjegjësi për mbrojtjen tonë”, tha ai, duke përmendur se SHBA-të ende kanë mbi 80 mijë trupa në Evropë dhe mbeten thellësisht të angazhuara në sigurinë evropiane, edhe pse po e zhvendosin fokusin drejt Azisë.
Sa i përket së ardhmes së mbrojtjes evropiane, Rutte hodhi poshtë idenë e një sigurie pa NATO-n si shtyllë kryesore.
Ai theksoi se 75 për qind e PBB-së së NATO-s vjen nga vende jashtë Bashkimit Evropian dhe se SHBA-të janë “me diferencë kombi më i fuqishëm në botë”.
Sipas tij, “nuk mund ta imagjinosh NATO-n pa udhëheqësin e botës së lirë si pjesë përbërëse të asaj organizate”.
