Të paktën katër persona kanë humbur jetën gjatë një sulmi ajror të natës nga Rusia mbi kryeqytetin ukrainas, Kiev. Lajmin e ka bërë të ditur ministri i Brendshëm i Ukrainës, Ihor Klymenko, përmes një postimi në rrjetet sociale, raporton BBC.
Sipas tij, raketat dhe dronët rusë goditën zona të banuara, spitale dhe infrastrukturë sportive. “Një pjesë e tërë e një ndërtese të lartë banimi u shkatërrua” në distriktin më të goditur, Shevchenkivskyi, ku dyshohet se ka ende njerëz të bllokuar nën rrënoja.
Në rajonin e Kievit, një grua u vra dhe dy persona të tjerë mbetën të plagosur nga sulmi ajror rus, konfirmoi edhe kreu rajonal Mykola Kalashnyk.
Shërbimi i Emergjencave të Ukrainës (DSNS) bëri të ditur se gjithsej 13 persona janë plagosur në Kiev, përfshirë dy fëmijë dhe një grua shtatzënë.
Në të gjithë kryeqytetin janë raportuar disa zjarre, ndërsa një hyrje e metrosë së qytetit është dëmtuar nga shpërthimet. Shumë qytetarë kaluan natën në stacionet e metrosë për t’u strehuar.
Ky sulm vjen në një kohë kur Rusia ka intensifikuar sulmet ajrore ndaj Kievit dhe qyteteve të tjera ukrainase. Presidenti rus Vladimir Putin e nisi pushtimin në shkallë të plotë të Ukrainës në shkurt të vitit 2022.
