Pas akuzave nga vendet evropiane se pas incidenteve me dronë në hapësirën ajrore të Danimarkës qëndron Rusia, ka reaguar ambasada ruse në Danimarkë e cila hodhi poshtë sugjerimet se Rusia qëndron pas pamjeve të dronëve pranë aeroporteve dhe bazave ushtarake daneze.
Në një deklaratë të publikuar në Telegram, ambasada thekson se “Është e qartë se incidentet që përfshijnë ndërprerjet e raportuara në aeroportet daneze janë një provokim i inskenuar.”
Sipas saj, këto incidente nuk janë të rastësishme, por pjesë e një skenari të qëllimshëm me synim krijimin e tensioneve dhe destabilizimin e situatës në rajon.
Deklarata vijon duke sugjeruar se arsyeja e këtyre akuzave qëndron në krijimin e një preteksti për përshkallëzim të situatës: “Pa dyshim, ato do të përdoren si pretekst për përshkallëzimin e mëtejshëm të tensionit në interes të forcave që kërkojnë me të gjitha mjetet ta zgjasin konfliktin ukrainas dhe ta zgjerojnë atë në vende të tjera.”
Në fund, ambasada ruse shpreh me vendosmëri refuzimin e çdo akuze të pabazuar, duke theksuar se “Pala ruse i hedh poshtë me vendosmëri spekulimet absurde të përfshirjes në incidente.”
