Rusia dhe Ukraina kanë akuzuar njëra-tjetrën të mërkurën se kanë nisur sulme të reja kundër objekteve energjetike të njëra-tjetrës, duke shkelur kështu një marrëveshje të ndërmjetësuar nga ShBA për ndalim të sulmeve në infrastrukturën energjetike.
Ministria ruse e mbrojtjes tha se Ukraina kishte kryer sulme me dronë dhe granatime në rajonin perëndimor të Kurskut, duke ndërprerë energjinë për mbi 1500 familje, ka raportuar Reuters.
Ndërkohë, presidenti ukrainas Volodymyr Zelensky tha se një dron rus goditi një nënstacion energjetik në rajonin Sumy dhe zjarri i artilerisë dëmtoi një linjë elektrike në Dnipropetrovsk, duke ndërprerë energjinë elektrike për gati 4,000 konsumatorë.
Administrata Trump ka shprehur mosdurim ndaj të dyja palëve, ku presidenti amerikan ka kritikuar liderët e të dy vendeve për mosbashkëpunim në arritjen e marrëveshjes për një armëpushim përfundimtar.
Zëdhënësi i Kremlinit, Dimitry Peskov tha se Moska do të vazhdojë të punojë me amerikanët pavarësisht nga ato që ai i quajti sulmet e përditshme të Ukrainës në infrastrukturën energjetike ruse.
Kurse, Zelensky tha të martën se Rusia po thyente armëpushimin e energjisë dhe i bëri thirrje SHBA-së të rrisë sanksionet kundër Moskës, siç ka kërcënuar të bëjë Trump.
Ukraina tha muajin e kaluar se ishte e gatshme të pranonte një armëpushim të plotë 30-ditor, por Putin nuk pranoi të pajtohej me këtë, duke ngritur një sërë pyetjesh se si do të monitorohej dhe shqetësime se Ukraina do të përdorte hapësirën e frymëmarrjes për të mobilizuar më shumë ushtarë dhe për të marrë më shumë armë nga Perëndimi.
