Të paktën një person është vrarë dhe disa të tjerë janë plagosur në sulmet ajrore ruse në Kiev, si dhe në jug të Ukrainës.
Kryebashkiaku i Kievit, Vitali Klitschko tha se sulmet ajrore në kryeqytet herët të dielën shkaktuan zjarre në ndërtesa jorezidenciale në tre rrethe dhe lanë të paktën një person të vrarë dhe tre të tjerë të plagosur.
Kjo vjen pas sulmit që Rusia bëri të premten në vendlindjen e presidentit ukrainas, Volodymyr Zelenskyy ku zyrtarët thanë se numri i të vdekurve nga sulmi i së premtes në qytetin qendror të Kryvyi Rih kishte vazhduar të rritet, me 19 të vdekur – në mesin e tyre edhe fëmijë – dhe 75 të tjerë të plagosur.
Oleksandr Vilkul, kreu i administratës ushtarake të Kryvyi Rih, shpalli tre ditë zie për sulmin, duke filluar nga 7 prilli. Ai tha se kishte “dhimbje në zemrat e miliona njerëzve”.
Ministria ruse e Mbrojtjes pretendoi të premten se kishte kryer një sulm me raketa me precizion të lartë me një kokë lufte me eksploziv të lartë në një restorant ku po zhvillohej një takim me komandantët e njësive dhe instruktorët perëndimorë, ka raportuar AP.
Ushtria ruse pretendoi se sulmi vrau 85 ushtarakë dhe oficerë të huaj dhe shkatërruan 20 automjete. Shtabi i Përgjithshëm i Ukrainës hodhi poshtë pretendimet.
