Njëri prej lojtarëve më të mirë të Rumanisë, Razvan Marin shpreson që ndeshja ndaj Kosovës në Bukuresht të kalon pa ndonjë telashe.
Mesfushori 28-vjeçar, i cili ka shënuar gola në të gjitha ndeshjet e Rumanisë në këtë kampanjë të Ligës së Kombeve, pritet të jetë edhe kërcënimi më i madh për portën e Kosovës.
Rumania dhe Kosova, përballen të premten në ndeshjen vendimtare për vendin e parë në Grupin C2 t Ligës së Kombeve.
Në tri ndeshjet e mëparshme mes Kosovës e Rumanisë ka pasur thirrje të tifozëve rumun “Kosova është Serbi” soi në Prishtinë ashtu edhe Bukuresht.
Marin, i cili luan te Cagliari në Serie A i është drejtuar tifozëve rumun duke kërkuar prej tyre që të përmbëhan dhe të respektojnë himnin e Kosovës.
Me mesazh publik, tifozëve të Rumanisë i janë drejtuar edhe futbollistët tjerë të kombëtares rumune.
“Një mesazh i qartë tashmë është shpërndarë, që të jemi të qetë dhe mos të ketë probleme. Nuk mund të jetë revansh për ne, është më shumë për ata. Qartë se tifozët tanë do të fishkëllejnë gjatë himnit të tyre. Ne ende shpresojmë se nuk do ta bëjnë këtë, por le të shohim. Duam të fitojmë dhe të shfaqemi mirë si në ndeshjen në udhëtim”, ka thënë Marin.
Rumania i ka katër fitore deri më tani dhe i prinë grupit, ndërsa Kosova ka tri fitore e një humbje dhe ka tri pikë më pak se rumunët.
“Dardanëve” i duhet fitorja me më shumë se tri gola dallim në Bukuresht për ta kaluar Rumaninë në renditje.
