Rumania i dërgoi katër avionë luftarakë për patrullim mëngjesin e 19 tetorit, pasi një objekt i paidentifikuar e shkeli hapësirën e saj ajrore në juglindje të vendit, afër Detit të Zi, tha Ministria rumune e Mbrojtjes.
Sipas Ministrisë, radarët e vërejtën një objekt të vogël duke fluturuar – me gjasë një dron – drejt Tulkeas, para se ta humbnin sinjalin rreth orës 2:30 të mëngjesit të shtunën.
Ky është droni i dytë që e shkel hapësirën ajrore kombëtare të Rumanisë, sipas saj.
Ushtria i ngriti dy avionë luftarakë F-16 dhe dy avionë spanjollë F-18 për ta vëzhguar objektin, tha Ministria, duke shtuar se pilotët nuk e panë dronin.
Incidenti i kaluar u raportua më 17 tetor, kur një objekt i vogël fluturues u vërejt nga radarët e ushtrisë mbi kontin Konstanta në juglindje.
Kryeministri i Rumanisë, Marcel Ciolacu, tha më 18 tetor se vendi i tij po e analizon mundësinë e një “sfide kibernetike, sepse pilotët nuk kishin kontakt vizual me dronin”.
Në të kaluarën, dronët rusë janë futur në hapësirën ajrore të Rumanisë gjatë sulmeve ruse kundër caqeve ukrainase përgjatë Detit të Zi dhe Lumit Danub.
Rumania, anëtare e Bashkimit Evropian dhe NATO-s, ndan një kufi 650 kilometra të gjatë me Ukrainën./rel
