Futbollistët e Kombëtares së Rumanisë nuk do ta kenë stadiumin e mbushur për ndeshjen kundër Kosovës në kuadër të Ligës së Kombeve, që luhet muajin e ardhshëm.
UEFA ka marrë masa ndaj Federatës së Futbollit të Rumanisë për shkak të thirrjeve raciste dhe diskriminuese të rumunëve në ndeshjen kundër Lituanisë të luajtur më datën 9 shtator.
Krahas thirrjeve, rumunët shpalosën edhe pankarta me mesazhe të papërshtatshme për Komisionin Disiplinor dhe të Etikës të UEFA-s, i cili ka reaguar.
Për këtë veprim, federata rumune është gjobitur nga UEFA me 52 mijë euro në total, si dhe do ta ketë të mbyllur një pjesë të tribunave të stadiumit për ndeshjen e ardhshme që e luan në shtëpi.
Më 15 nëntor, Rumania e pret Kosovën në kuadër të xhiros së pestë të Ligës së Kombeve dhe federata rumune do të jetë e detyruar ta mbyll një sektor të tribunave prej 3 mijë ulëseve përball “Dardanëve”.
Kjo nuk është hera e parë që federata rumune dënohet për gjëra të tilla nga UEFA, ndërsa ndeshja me Kosovën do të jetë e rëndësishme për vendin e parë në grup.
Aktualisht, Rumania i prinë grupit 2 të Ligës C me 12 pikë, tri më shumë se Kosova që renditet e dyta kurse deri në fund të kësaj kampanje të Ligës së Kombeve kanë mbetur edhe dy ndeshje për t’u zhvilluar, të cilat luhen muajin e ardhshëm.
