Ish-zëdhënësi i Departamentit Amerikan të Shtetit gjatë kohës së bisedimeve të Rambujesë, James Rubin, ka folur për marrëdhënien e tij me Hashim Thaçin gjatë atyre negociatave, duke theksuar se Thaçi nuk ishte i drejtpërdrejtë në komunikim dhe nuk i shpjegonte vendimet që merrte.
“Thaçin e njoha në Rambuje dhe ai nuk ishte i hapur me mua, e as unë me të. Ai nuk më tregonte çfarë duhej të bënte dhe pse i bënte,” u shpreh Rubin.
Ai shtoi se gjatë bashkëbisedimeve, Thaçi nuk i kishte thënë kurrë fjalë për fjalë se çfarë mendonte të ndërmerrte dhe me kë duhej të konsultohej për çështje të rëndësishme.
“Nuk më ka thënë asnjëherë fjalë për fjalë se çfarë duhet të bënte apo se me kënd duhej të konsultohej,” tha Rubin.
Sipas tij, ishte e qartë që Thaçi nuk merrte vendime të pavarura, por kishte njerëz mbi të nga të cilët kërkonte miratim.
“Për mua ishte e qartë se Thaçi kishte eprorë diku nga të cilët duhej të merrte miratimin,” deklaroi Rubin.
Ai kujtoi se Thaçi shpesh i referohej nevojës për t’u konsultuar me komunitetin, udhëheqësit apo popullin – një gjuhë që Rubin e përshkruan si “të mjegullt”.
“Ai ishte shumë i mjegullt në gjuhën e tij, thoshte se duhej të konsultohej me komunitetin, me udhëheqësit, me popullin,” shtoi ai.
Rubin veçoi Adem Demaçin si një figurë me ndikim në atë kohë, duke përmendur që Demaçi kishte pasur qëndrime kritike ndaj marrëveshjes së Rambujesë dhe kishte komunikim të drejtpërdrejtë me sekretaren amerikane të shtetit, Madeleine Albright.
“Unë nënkuptova që [Adem] Demaçi ishte shumë i rëndësishëm, sepse ai kishte folur me Medeleine Albright dhe ishte ndër personat që nuk ishte në favor të Rambujesë,” tha Rubin.
Në përmbyllje, Rubin sugjeroi se Thaçi ndoshta përpiqej të krijonte konsensus të brendshëm brenda lëvizjes shqiptare në Kosovë, por nuk ishte i sigurt nëse kjo ishte kërkesë nga jashtë apo iniciativë personale.
“Fakti që duhej të konsultohej me të, sipas meje, ai përpiqej që t’i përfshinte të gjithë në proces. Nuk e di a i kërkohej ta bënte këtë,” përfundoi ai.
