Ish-diplomati amerikan, James Rubin, gjatë dëshmisë së tij ka deklaruar se Ushtria Çlirimtare e Kosovës nuk kishte një strukturë të mirëfilltë ushtarake, por funksiononte më shumë përmes grupeve dhe klaneve të ndryshme.
Sipas tij, UÇK-ja nuk posedonte hierarki ushtarake të qartë me batalione apo brigada, ndërsa nuk kishte as polici ushtarake.
“Unë e di që kishin uniforma, disa kishin disa jo. Ne nuk i konsideronim ata si komandantë apo shtab i përgjithshëm”, ka thënë Rubin.
Ai po ashtu është ndalur edhe te komunikatat e lëshuara nga UÇK-ja, për të cilat theksoi se nuk pasqyronin realitetin e forcës dhe organizimit të saj.
“Kam lexuar shpesh komunikata [të UÇK], por më dukeshin si përpjekje për ta bërë UÇK-në më të rëndësishme se ç’ishte. Për mua ishin thjeshtë manipulime”, ka deklaruar Rubin.
