Në vazhdim të dëshmisë së tij në Dhomat e Specializuara në Hagë, ish-zyrtari i lartë amerikan James Rubin u përball me pyetjet e gjykatësit nga Irlanda, Fergal Gaynor, lidhur me rolin e Hashim Thaçit gjatë bisedimeve të Rambujesë.
Gjykatësi Gaynor i referohej një pjese të një dokumentari të publikuar nga BBC në vitin 2000, ku ish-sekretarja amerikane e Shtetit, Madeleine Albright, i referohej Thaçit si lider. Megjithatë, Rubin theksoi se fjalët e saj duhet të interpretohen me kujdes.
“Unë mendoj që ajo ka zgjedhur me kujdes fjalët e saj. Ajo nuk tha lideri, por ‘një prej liderëve’. Dhe ka një dallim të madh. Ajo e krahasoi me Gerry Adams – një lider që e drejtoi kombin drejt lirisë,” u shpreh Rubin.
Ai sqaroi se Thaçi në atë kohë ishte një drejtues i delegacionit shqiptar në Rambuje, por jo i vetmi udhëheqës politik i shqiptarëve të Kosovës.
“Ne donim që ai të kthehej një udhëheqës i një kombi, që me shpresë do të ishte i lirë. Po ju korrigjoj, ajo tha ‘një drejtues të një grupi’, një drejtues i një delegacioni që ishte zgjedhur nga delegacioni shqiptar. Ai ishte një prej tyre, kishte një pozicion udhëheqës. Edhe nëse ka thënë ‘udhëheqës i delegacionit’, kjo është e saktë,” shtoi ai.
Gjykatësi Gaynor më pas e pyeti Rubin nëse ishte në dijeni për pretendimet se Thaçi kishte kërcënuar dy anëtarë të tjerë të delegacionit të Kosovës që nuk ishin pjesë e UÇK-së, duke iu referuar deklaratave të Veton Surroit dhe Dukagjin Goranit në dokumentar.
Rubin tha se nuk ka pasur dijeni për kërcënime fizike, por nuk e mohoi ekzistencën e presionit ideologjik brenda delegacionit.
“Ta ndajmë kërcënimin fizik nga ai moral. Jo, nuk e kam ditur që ka pasur kërcënim fizik, por e di që ka pasur presion ideologjik – pro ose kundër pavarësisë – sepse kjo ishte kryesorja për lëvizjen gjatë luftës,” u shpreh Rubin.
Ai gjithashtu tha se presione të tilla nuk kanë ardhur vetëm nga Thaçi, por edhe nga faktori ndërkombëtar.
“Albright e ka kërcënuar Thaçin duke i thënë se nëse nuk nënshkruan, nëse i lë njerëzit e pambrojtur nga serbët… Kam dëgjuar edhe se është kërcënuar edhe Demaçi,” deklaroi Rubin.
Rubin më herët kishte deklaruar se Adem Demaçi ishte figura më e lartë morale e lëvizjes shqiptare në Kosovë, duke e krahasuar me Nelson Mandelën.
