Faturën të enjten e vendosën para Ministrisë së Ekonomisë.
Në të paraqitën shpenzimet mujore të një familje katër anëtarësh në Kosovë.
Të ardhurat mujore, u caktuan 1 mijë euro.
Por, në fund shpenzimet mujore, dolën 85 euro më shumë.
Në këtë formë, rinia e Partisë Demokratike të Kosovës, të enjten zhvilloi një aksion simbolik.
Krejt kjo për ta kundërshtuar një rritje të re të çmimit të energjisë elektrike.
“Një familje në Kosovë, me 1000 euro të ardhura mujore, ka 1085 euro shpenzime bazike. Pa luks, pa pushime, pa kursime. Vetëm bukë, vetëm rrymë, vetëm ngrohje, vetëm qira, ilaçe dhe shkollë për fëmijët. Minus 85 euro çdo muaj. Çdo muaj fillon me borxhe. Çdo muaj mbyllet me frikë”, ka thënë Syla.
E për këtë çështje, të mërkurën foli edhe ministrja në detyrë e Ekonomisë, Artane Rizvanolli.
Kjo e fundit tha se pa publikimin e raportit të ZRrE-së, nuk mund të deklarohet.
Por, deri në përmirësimin e situatës me energji elektrike, duhet sakrificë.
“Kjo do të thotë që për këto vite, vjet, sivjet dhe vitin e ardhshëm ne do të kalojmë një periudhë sfiduese, sepse blloqet duhet të ndalen, është e domosdoshme të ndalen për një kohë për disa muaj, në mënyrë që investimet të realizohen. Kjo është një sakrificë që duhet të bëjmë ne, për ne dhe gjeneratat e ardhshme. Është investimi i parë serioz që po bëhet në KEK pas 40 viteve”, u shpreh Rizvanolli.
Por, njohësit e çështjeve të energjetikës, thonë se deklarimet e tilla shpërfaqin mungesën e përgjegjësisë.
“Deklarata të tilla tregojnë papërgjegjësi dhe mungesë të llogaridhënies për gjendjen kaotike të sistemit elektroenegjetik, të cilat do të çojnë në fatura më të larta për qytetarët, në mungesë stabile të furnizimit me energji elektrike, në humbje të konkurruncës mes biznesve, dhe në fund varfërim të qyetarëve.”, ka thënë Haxhimusa.
Në lidhje me këtë çështje, duarkryq nuk pritet të qëndrojë zyra e presidencës.
“Në rast se do të ketë ndryshime apo rritje të tarifave, qëndrimi ynë do të mbetet i njëjtë, ashtu siç ka qenë në çdo rast kur çështja e rritjes së çmimeve ka qenë në diskutim. Në momentin që hapet thirrja për komente, do t’i dorëzojmë komentet tona si edhe vitet e kaluara, duke u udhëhequr nga interesi publik”,kanë njoftuar nga Zyra e Presidencës.
Ndryshe, Presidentja Vjosa Osmani kishte kundërshtuar shtrenjtimin e rrymës për 16% vitin e kaluar, por që nga ZRRE nuk u mor parasysh.
