Adnan Rrustemi, deputet i Lëvizjes Vetëvendosje, ka komentuar profesionalizim e tre gjyqtarëve të cilët kanë bërë propozimin e kandidatëve për Bord të Organit Shqyrtues të Prokurimit Publik (OSHP).
“Po unë nuk dua të paragjykoj, por për sa kohë që nuk kanë kaluar propozimet të këtij organi, kjo lë shumë për të dëshiruar për sa i përket objektivitetit dhe paanshmërisë dhe profesionalizimit. Përndryshe, po të rekomandoheshin personalitete të tjera nga ajo lista e gjerë që e kishte rekomanduar ose propozuar Qeveria, unë jam i bindur që OSHP sot do të ishte funksionale”, ka thënë ai.
Në lidhje me komentimin e profesionalizmit të gjykatësve në përzgjedhjen e kandidatëve të OSHP-së për t’u rekomanduar për votim në Kuvendin e Kosovës, zyrtarët e Këshillit Gjyqësor të Kosovës kanë refuzuar të komentojnë.
“Këshilli Gjyqësor i Kosovës (KGJK) nuk deklarohet dhe nuk komenton vendimet e institucioneve të tjera”, thuhet në përgjigjen e tyre dhënë për emisionin “De Jure”.
Për më shumë ndiqeni hulumtimin “Lufta politike” për gjykatën e tenderëve, i cili po transmetohet në “Tëvë1” dhe “Betimi për Drejtësi”./Tëvë1/
