Kryetari i Komisionit për Legjislacion, Adnan Rrustemi në emisionin “Info Nata” nëTëvë1, ka thënë se nuk janë kundër krijimit të Komisionit Hetimor, por sipas tij, mazhoranca nuk mund ta mbështetë një nismë që është në kundërshtim me ligjin.
“Ne nuk jemi kundër komisionit hetimor, megjithatë ne nuk mund të mbështesim një nismë që është në kundërshtim me ligjin”, ka thënë ai.
Sipas tij, edhe në herën e parë edhe të dytën sfidohet Kuvendi duke mos u përmbushur kushtet procedurale dhe ligjore sa i përket Komisionit Hetimor për energjinë.
“Është hera e dytë që partitë politike të opozitës PDK, LDK, AAK paraqesin në Kuvend kërkesën për themelimin e një Komisioni Hetimor, ndërkohë që edhe në herën e parë dhe të dytë sfidohet Kuvendi duke mos u përmbushur kushtet procedurale dhe ligjore që parasheh ligji për hetim parlamentar, por edhe fryma e Kushtetueses sa i përket këtij komisioni sikurse rregullorja e këtij Kuvendi”, tha Rrustemi.
Ai thotë se të gjitha partitë opozitare ishin bërë bashkë për hetimin parlamentar ndërkohë sipas tij, nuk e kishin menduar obligimin ligjor që kryesuesi i këtij komisioni nuk mund të jetë as nga iniciuesi e as nga mazhoranca.
“Nuk është çështja e bllokimit nga ana e deputetëve tanë, ne duhet të kemi parasysh relacionet ose raportet e ndërtuara në Kuvendin e Kosovës në mes të mazhorancës dhe partive opozitare të cilat synonin ta paraqisnin që është në përputhje me ligjin për hetim parlamentar, ndërkohë që nuk ishte. Në rastin konkret mospajtimin me ligjin qëndronte në faktin që të gjitha partitë politike të opozitës ishin bërë bashkë në këtë kërkesë për hetim parlamentar, ndërkohë qe nuk e kishin menduar obligimin ligjor që kryesuesi i këtij komisioni nuk mund të jetë as nga iniciuesi e as nga mazhoranca. D.m.th ishin në një bllokadë procedurale që janë hyrë vetvetiu dhe natyrisht kur e kuptuan një gjë të tillë u përpoqën të hedhin fajin mbi mazhorancën”, tha Rrustemi. /teve1.info/
