Teutë Rrusta nga PSD-ja deklaroi se Molliqajt nuk i ka shkruar asnjë ftesë që të paraqitet në seancë gjyqësore.
Rrusta në Tëvë1 theksoi se Molliqaj nuk ka mundur të paraqitet në seancë duke i dëgjuar lajmet përmes medieve pasi që pohon se atij nuk i ka shkuar as asnjë ftesë në shtëpi apo në punë.
“Kryetari i Partisë Socialdemokratike, ka adresë të shtëpisë dhe të punës dhe në asnjërën prej këtyre nuk i ka shkruar ftesa për seancë, nuk mundet të paraqitet në seanca duke i dëgjuar lajmet përmes medieve. Një komunikim i tillë i Gjykatës dhe policisë përmes medieve , në rastin më të mirë është jo profesional e në rastin më të keq është politik”, tha ajo.
Rrusta në një lidhje direkte në emisionin “Ditari” tha se aktivistët e PSD-së po arrestohen me brutalitetin më të madh dhe sipas saj, kjo është bërë një politikë që po përsëritet ndaj anëtarëve të kësaj partie.
Rrusta bëri të ditur se gjatë arrestimit të Dardan Molliqaj janë arrestuar gjithashtu edhe katër aktivistë tjerë të PSD-së.
“Është krijuar një politikë që po përsëritet ndaj aktivistëve të Partisë Socialdemokrate ku arrestohen me brutalitetin më të madh. Sot përveç arrestimit të Dardanit me arsyetimin për fletarrestim nga gjykata për seancën që ju e përmendët. Katër aktivistët tjerë, Zgjim Hyseni, Frashër Krasniqi, Korab Korca dhe Egzon Kastrati u janë arrestuar gjatë arrestimit të Dardan Molliqaj për shkak se polica të cilët ishin në masën më të madhe civil, ndërhyri në mënyrë brutale menjëherë pas protestës së veteranëve”, tha ajo./Teve1.info/
https://teve1.info/lajmet/arrestohet-dardan-molliqaj/
