Rruga rajonale, e cila lidh fshatrat e katër komunave Klinë, Malishevë, Skënderaj e Drenas është në gjendje të rëndë tash e një kohë.
Por, e njëjta është dëmtuar në masë të madhe duke e shkaktuar kështu edhe vështirësi në qarkullim të veturave.
Andaj edhe banorët e fshatit Caravikë të Klinës po kërkojnë që kjo rrugë të rregullohet sa më parë.
“I kisha bë apel Ministrisë që me na rregullu se ka të bëjë shumë me qarkullime vijnë prej Abrije rrethit të Duk Gjakovës, vijnë Malishevës, vijnë shumë komuna që operojnë, zhvillojnë biznese të ndryshme. Kem nevojë me na rregullu rrugën se fortë është prishur”, tha Adem Dakaj, banor i Ceravikës.
Derisa udhëtarët që kalojnë pothuajse çdo ditë këtë rrugë, po vlerësojnë se në mungesë të infrastrukturës, edhe po shpopullohen fshatrat.
“Unë ju kisha lut kushdo që është kompetent për këtë me ndërmarrë sa më shpejt, se na me të vërtetë po e shohim një shpopullim të fshatrave në çfarë gjendje është. Nëse edhe fshatrat nuk i rrijmë gati mi mbajtë këta banorë që janë afër në fshatra ne nuk di edhe kah dojmë me shku kështu dmth mungesa e infrastrukturës nëpër fshatra po bën me shpopullu vendin. Kjo është një shqetësim faktik”, tha një banor i qytetit të Skenderajt.
E kryetari i Komunës së Klinës thotë se ka marrë premtime nga niveli qendror se shpejt do të intervenohet në këtë rrugë.
Mirëpo thotë se po përballen me mungesë investimesh ku vlerëson se kjo mund të jetë edhe për dallime partiake që i kanë.
“Kemi premtime se së shpejti ata në bazë të mundësive buxhetore do të fillojnë me sanimin edhe të kësaj rruge por edhe rrugëve tjera në Komunën e Klinës…Po është e vështirë sepse duhet me pasë analiza edhe nga Komuna tjera, por është e vështirë për mua me thënë që po bëhet diçka me qëllim por që nuk ka investime kjo dihet, mirëpo nuk mund të them se është e qëllimshme nga Qeveria”, tha Zenun Elezaj.
Tëvë1 ka kërkuar përgjigje edhe nga Ministria e Infrastrukturës të marrë përgjigje se pse nuk është duke u rregulluar kjo rrugë, mirëpo nuk ka pasur përgjigje.
