Autori: Adea Mustafaj
Rruga “Imer Musa” në lagjen Dardania 3 të Pejës ka mbetur e asfaltuar pjesë-pjesë.
Kjo, pas ndërhyrjeve për rregullimin e ujërave të zeza një vit më parë.
Mirëpo prej asaj kohe, rruga nuk është rregulluar tërësisht.
Banorët ankohen për vështirësi në qarkullim.
Një nga ta është Xhavid Berisha, i cili u shpreh se kjo gjendje po ua vështirëson jetën e përditshme.
“Ka afër një vit që rruga është kështu. Kanë thënë që e kanë lënë shkaku i kyçjes së banorëve me kanalizim, por tash të gjithë janë kyçur në këtë rrugë. Tash veç po presim me u rregullu, sepse po na pengon me vetura, kalojnë njerëzit këndej pari, po është rruga e prishur, dëmtohen veturat”, ka thënë Berisha.
Të njëjtin hall ndan edhe Bashkim Haxhaj.
“Nuk po mujna me kalu me kerr këndej, se rruga është e keqe”, ka thënë qytetari.
Për këtë gjendje, nga Komuna e Pejës thonë se projekti është ende në zhvillim dhe se vonesat janë shkaktuar për shkak të problemeve teknike dhe juridike.
“Ky projekt është dyvjeçar, projekti vazhdon ende, por kemi ngecje momentalisht sepse në një pjesë në fshatin Loxh kemi hasur në rezistencë nga disa banorë, pasi që kalon në tokat e tyre dhe nuk lejojnë të vazhdohet kanalizimi. Janë duke kryer kanalizimin, tani do t’i kthehen rregullimit të rrugëve të dëmtuara”, ka thënë Agron Nikçi, drejtori i shërbimeve publike.
E nga opozita në Pejë po kërkohet më shumë përgjegjësi kur planifikohen projekte të tilla.
“Qytetarët janë pak të idhnuar, por tash nuk e di pse s’kanë arritur me e kry. Ka pasur probleme me buxhet Komuna shumë. Nuk po du me fajësu, se kjo na takon edhe neve. Kemi pasur probleme buxhetore, mirëpo besoj që ka me u përfundu ajo rrugë, megjithëse është dashtë menjëherë me u ndërtu pasi është vendos kanalizimi. Por besoj që në afat duhet me u ndërtu”, ka thënë Nezir Jahmurataj.
Ky projekt përfshin vendosjen e sistemit të ujërave të zeza për disa zona të Pejës, nga Raushiqi, Loxha, Grabovci, Dardania 3 e deri në Gorozhdec.
