Shenjat janë të dukshme përkundër që u tentua të fshihen.
Kjo meqë rruga “Ilaz Kodra” në lagjen “Dardania” në Prishtinë, që më parë ishte vetëm një kahëshe, nga 1 shkurti u lëshua përkohësisht për qarkullim në të dyja drejtimet.
I habitur nga ndryshim u shpreh ky qytetar.
“Është shumë parregullt, së pari është dashur të hiqen stubat, tani me e lëshu e me ju tregu njerëzve. Se unë dje u habita kur i pash këndej”, tha qytetari Sadik Ibishi.
Por ndryshe po mendon banori Enver Sejdiu.
“Kur i kam pa u gëzova, edhe shumë mirë e kanë bë, çdo lëvizje është e mirë pse me blloku”, tha qytetari Enver Sejdiu.
E për njohësin e komunikacionit, Lavdim Hamiti, Komuna e Prishtinës nuk ka vendosur sinjalizimin në mënyrë të duhur.
“I ka bërë 2 apo 3 shenja diku edhe atëherë vetëm fillohet si rrugë dy kahore. Për çdo parking që kyçet në rrugë duhet të ketë të gjitha shenjat që rruga është dykahore, në këtë rast nuk e kemi dhe që më e keqja është që mbulesa e shenjave horizontale është bërë me ngjyrë joadekuate. Se sidomos natën reflekton në dritat e veturës në ato shenja e prapë dalin në sipërfaqe shenjat që kanë qenë më herët”, tha njohësi i komunikacionit, Lavdim Hamiti.
Nga Komuna e Prishtinës kanë një sqarim për këtë.
“Për shkak të kufizimit që kemi me kontratat e sinjalistikës, ne jemi duke bërë përpjekje me rregullu atë pjesë. Domethënë disa janë të vendosura disa shenja, e disa të tjera mbetet që gjatë javës së ardhshme të vendosen për shkak të kushteve dhe motit që na ka marrë”, tha u.d udhëheqësi i sektorit për Transport dhe Trafik, Halit Haliti.
Sipas këtij të fundit, ky ndryshim u bë për të lehtësuar qarkullimin dhe shkarkuar trafikun brenda lagjes “Dardania”.
