Policia e Kosovës ka apeluar të gjithë qytetarët, sidomos familjet me fëmijë që të tregojnë kujdes të shtuar gjatë qëndrimit në natyrë në zonën malore të Shtërpcës.
Sipas Policisë në këtë zonë malore është vërejtur një rritje e konsiderueshme e pranisë së kafshëve të egra, veçanërisht e arinjve.
Në njoftim thuhet se këto kafshë janë parë në afërsi të vendbanimeve, çka sipas Policisë paraqet një rrezik të drejtpërdrejtë për sigurinë e qytetarëve.
“Situata bëhet edhe më shqetësuese në zonat malore përreth Brezovicës, sidomos përreth liqeneve të Shtërpcës, me theks tek liqeni i Jazhincës, ku çdo ditë qëndrojnë një numër i madh turistësh dhe vizitorësh vendorë e të huaj. Shumë prej tyre janë në kontakt të afërt me kafshët e egra, duke bërë fotografi dhe video nga distanca të papërshtatshme (vetëm 10-20 metra larg), veprime të cilat mund të çojnë në pasoja serioze për jetën e tyre”, theksohet në njoftim.
Në njoftim bëhet e ditur se në bashkëpunim me institucionet përgjegjëse, do të ndërmerren masa informuese dhe parandaluese./teve1.info/
