Zhvillimet e fundit në Lindjen e Mesme kanë përshkallëzuar ndjeshëm situatën e sigurisë, pas sulmeve të raportuara në disa shtete të rajonit, përfshirë Dubai, Abu Dhabi, Doha, si dhe në Bahreini dhe Kuvajti.
Sipas raportimeve, një person ka humbur jetën dhe 11 të tjerë janë plagosur në aeroportet në Dubai dhe Abu Dhabi, ndërsa Irani ka nisur sulme në të gjithë rajonin, si reagim ndaj një sulmi masiv dhe të vazhdueshëm kundër tij nga Shtetet e Bashkuara të Amerikës dhe Izraeli.
Elson Bytyqi, banor rezident në Dubai, thotë se situata është shqetësuese, por qyteti vazhdon të funksionojë.
“Situata është shqetësuese, sepse njerëzit kanë frikë të dalin jashtë, por aktiviteti në Dubai nuk është ndërprerë. Njerëzit mund të dalin në restorante ose hotele. Çdo person, qoftë rezident apo turist, është i mbrojtur. Dubai na ka dhënë mundësinë të mbrohemi dhe kemi instruksione se si të qëndrojmë në shtëpi, hotele dhe në rrugë. Për momentin vetëm aeroporti është problem. Shteti po na dërgon mesazhe në telefon se si të veprojmë”, deklaroi ai në emisionin “Mesditë” në Tëvë1.
Sipas tij, situata është e pazakontë, por ai shpreh bindjen se brenda 24 orëve pritet rikthimi i normalitetit.
Ndërkohë, gazetarja Ita Gani, e cila jeton në Izrael, përshkruan një realitet shumë më të rëndë.
“Situata vazhdon të jetë shumë e vështirë edhe në këto momente. Ne duhet të jemi brenda në dhomat e sigurimit. Kishim një sulm shumë të fortë para 10 minutash nga Irani, vazhdon të jetë luftë e vështirë që nuk i ngjan asnjë lufte tjetër dhe gjithmonë jemi të mbyllur në shtëpi dhe në dhoma të sigurimit. Sulmi ishte në gjithë Izraelin, nuk kuptoj nëse ka ndonjë objektiv të caktuar, sepse është ndryshe nga herët e tjera. Gjithë populli po merr sinjalin që fillon sulmi i Iranit. Nga ky moment të gjithë duhet të jenë afër dhomës së sigurimit. Kështu që nuk ka ndonjë dallim se ku do të gjuaj dhe ku do të bjeri. Një raketë e Iranit është shumë e vështirë dhe shumë e fortë se po ra do të shkatërrojë një lagje të tërë”, deklaroi ajo.
Sipas saj, sulmet kanë përfshirë të gjithë territorin e Izraelit dhe qytetarët marrin sinjale paralajmëruese për fillimin e sulmeve, duke u detyruar të qëndrojnë pranë hapësirave të mbrojtura.
“Një raketë e Iranit është shumë e fortë dhe nëse bie, mund të shkatërrojë një lagje të tërë”, shtoi ajo, duke theksuar se aktualisht në vend funksionojnë vetëm supermarketet, ndërsa gjithçka tjetër është e mbyllur.
Ajo shtoi se Izraeli do të vazhdojë operacionet ushtarake deri në arritjen e objektivave të tij.
/teve1.info/
