Tre persona janë infektuar brenda dy javësh nga koronavirusi. Kurse së fundmi janë rritur edhe rastet e qytetarëve të prekur nga gripi sezonal. Për këtë IKSHPK ka kërkuar që persona mbi moshën 65 vjeçare te kenë kujdes dhe të respektojnë 5 masa mbrojtëse. Ndërsa mjekët rekomandojnë vaksinimin.
Me rënien e temperaturave janë rritur edhe rastet e personave të prekur nga gripi sezonal, por edhe nga koronavirusi.
E për këtë Instituti Kombëtar i Shëndetësisë Publike, ka bërë thirrje për kujdes, sidomos personave të moshuar.
Por këta të fundit e kanë një hallë. Thonë se po e kanë të pamundur të respektojnë rekomandimet e institucioneve shëndetësore.
“Ke kujdes por nuk mundesh mu ru se vejnë nga ajri, nuk ke qare pa hi në autobusë, nuk ke qare pa shku në spital është vështirë mu ru prej gripit”, shprehet një qytetar.
IKSHP ka kërkuar nga këta persona që të vaksinohen.
Por për dikë as vaksina nuk po kryen punë.
“E kam marrë që një muaj hiq fortë spo me doket që më ka ndihmu. Por shpresoj që na ndihmon, edhe do vaksina i kemi marrë dy që kanë qenë”, ka thënë qytetari Halil Krasniqi.
Edhe sipas specialistit të mjekësisë familjare, Rushit Ismaili, numri i qytetarëve që po kanë simptoma të gripit sezonal dhe koronavirusit është rritur.
“Tani kohëve të fundit është shtuar numri i personave që kanë probleme respiratorë, kollitje, shkuarje hundesh teshtitje të cilat mund të cilat mund të lidhen edhe me gripin sezonal dhe me rastet e koronavirusit, rekomandimet janë që personat sidomos mbi 65 vjeç të marrin vaksinën e gips sezonal”, thotë ai.
Sipas mjekut, Rushit Ismailit, këtë vit është rritur interesimi i qytetarëve për t’u vaksinuar kundër gripit sezonal.
“Deri me tani janë dhënë 8 mijë vaksina, kemi mjaftueshëm do të thotë se kemi 12 mijë vaksina, i kemi edhe 4 mijë të tjera rezervë i ftoj banorët e Prishtinës le të vijën për ti marrin por në rast nevoje do të porositim edhe të tjera. Mund të them se interesimi është shtuar, ndoshta është shtuar ndërgjegjësimi i qytetarëve dhe mbron nga gripi sezonal”, thotë ai.
Ndërsa sipas IKSHPK-së, ka rast të personave që marrin vaksinën kundër COVID-19 kryesisht përmes QKMF-ve, personat me sëmundje kronike dhe personat që udhëtojnë në vende te ndryshme.
