Hisen Berisha nga PDK-ja ka reaguar pas vendimit të Gjykatës së Dhomave të Specializuara, e cila rrëzoi kërkesën e përbashkët të mbrojtjes së Hashim Thaçit, Rexhep Selimit, Kadri Veselit dhe Jakup Krasniqit për përjashtimin e incidenteve jashtë periudhës së konfliktit nga aktakuza.
Berisha ka shprehur shqetësim për siç e quan ai, heshtjen e Qeverisë në detyrë përballë këtij procesi gjyqësor.
“Ajo çfarë është shqetësuese për mendimin tim është heshtja e Qeverisë së Kosovës, e cila në fillimet e saja të para, Kurti ka pasur një tjetër karakter politik. E tani me këtë heshtje faktikisht e legjitimon pikërisht këtë qëndrim me mosveprimin e tij – mosveprimi është edhe një lloj fajësie kur përfaqëson institucionet e jo opinionet personale lidhur me këtë proces”, tha Berisha.
Ai theksoi se në “vend të deklaratave formale ndaj vendimeve të Speciales”, institucionet e Kosovës është dashur të ndërmarrin hapa konkretë për të rishikuar bazën ligjore mbi të cilën funksionon kjo gjykatë.
“Në vend të kërkesave për mohim të akuzave, fakteve apo si po dëshirojnë me i quajtur me terminologjinë juridike atje dhe për ta arsyetuar rrëzimin e këtij mocioni, unë mendoj se është dashur të iniciohej amandamentimi i vet ligjit – bazës ligjore, mbi të cilën funksionon kjo Gjykatë dhe e cila faktikisht e mundëson që jo këta që mbahen në Hagë, por unë po them që në bazën juridike të funksionimit të këtyre Dhomave, duke iu referuar krejt bazës juridike të krejt periudhës kur ka ndodhur lufta – kjo bënë fajtor secilin shqiptar, shto kësaj edhe periudhën hetimore që e ka miratuar ky parlament nga legjislatura e kaluar – atëherë po del se këtu kemi të bëjmë me një narrativë të organizuar kundër luftës së Ushtrisë Çlirimtare të Kosovës, përtej rezultateve të saj që është pavarësia dhe liria”, tha ai.
Sipas Berishës, vendimet e fundit dhe qëndrimi institucional përbëjnë pjesë të një narrative më të gjerë që, siç thotë ai, është e orientuar kundër luftës së Ushtrisë Çlirimtare të Kosovës.
“Nëse e shohim në këtë mënyrë, atëherë kemi të bëjmë me një narrativë të organizuar kundër UÇK-së, përtej rezultateve të saj që janë pavarësia dhe liria e Kosovës”, përfundoi ai./teve1.info/
