Të organizuar ia mësyn sheshit “Skënderbeu”.
Mëngjesin e së mërkurës rreth 1300 biznese u mblodhën para Qeverisë së Kosovës.
Vendimi i Zyrës së Rregullatorit të Energjisë Elektrike për daljen e bizneseve në treg të hapur të energjisë, bëri që këto kompani për herë të dytë të dalin në protestë.
“Mos e ndal eksportin”, “Zëri i biznesit nuk fikët me rrymë” “ Kërkojmë tranzicion jo lëmoshë”, ishin disa nga pankartat e protestuesve të cilët e kundërshtuan këtë vendim.
Para objektit të Qeverisë ata paraqitën edhe kërkesat e tyre.
“Kërkesa jon është që brenda 10 ditëve ZRRE-ja ta pezullojë vendimin për dalje në treg të lirë, Qeveria e Republikës së Kosovës të ulet me ZRRE-në dhe të gjej masat që të ndihmojnë bizneset që të mos vërejnë efektin negativ që të mos ndikojnë në koston e jetesës së qytetarëve”, tha Lulzim Rafuna- kryetar i Odës Ekonomike të Kosovës
Përfaqësuesit e bizneseve iu drejtuan edhe me disa kërkesa tjera ekzekutivit.
“Këta mbrapa neve nuk janë oligark këta mbrapa neve janë heronjtë të Republikës së Kosovës, këta mbrapa neve janë ata që ndërtuan rrugë institucione e ura. Këta janë që ndërtuan edhe Qeveri edhe ministrin, mos ia merrni rinin, mos ia merrni pagat, mos i lëni në mërgim”, tha Adem Qorrolli përfaqësues i bizneseve.
Nga qeveria, protestuesit e vazhduan marshin e tyre deri para Zyrës së Rregullatorit.
Këtu ata lëshuan pankartat të cilat i mbanin në duar, duke kërkuar reflektim nga bordi i ZRRE-së.
“Aktualisht kemi dy lloje të çmimit, çmimi fiks 240 euro për MGË, se deri tash ka qenë 70 euro dhe çmimi Breza plus 70 euro distribuomi që ka qenë 5 euro plus fitimi i KESC, kjo që na vështirëson neve punën por na detyron që të shikojmë mundësi të tjera të zhvillimit të bizsnesev pra jo në Kosovë por në shtet tjetër”, u shpreh Alajdin Fusha pronar i një biznesi.
Nga data 1 qershor, kompanitë që kanë më shumë se 50 punëtorë apo mbi 10 milionë euro qarkullim kanë dalë në treg të hapur për furnizim me energji elektrike.
