Janë njësia elite e Forcës së Sigurisë së Kosovës.
Në nder të Epopesë së UÇK-së, ata u rreshtuan u rreshtuan në kazermën “Adem Jashari”.
Bashkë me njësinë elitë, në kazermë rreshtimin e bënë edhe kuadro të tjera të ushtrisë së Kosovës.
Pjesëmarrjen në ceremoni, komandantja supreme, Vjosa Osmani, e bëri me një veturë të veçantë, atë të Presidentit historik, Ibrahim Rugova.
Përgjatë parakalimit, Osmani u shoqërua nga komandanti i Forcës së Sigurisë së Kosovës, Bashkim Jashari.
Para ushtarëve, Presidentja theksoi se FSK është e gatshme për çdo sfidë brenda dhe jashtë vendit.
“Sot krenaria jonë nuk qëndron vetëm në të kaluarën. Ajo marshon para nesh me uniformë moderne, me profesionalizëm të lartë dhe me përkushtim të palëkundur ndaj Republikës sonë. Forca e Sigurisë së Kosovës është trashëgimtare denjë e UÇK-së. Ajo bart në zemër idealin e lirisë dhe në duar mban përgjegjësinë e sigurisë së vendit”, tha Osmani.
Fjalim para tw pranishmwve, mbajti edhe kryeministri Albin Kurti, i cili tha se “Epopeja e UÇK-së”, përfaqëson një nga momentet më të rëndësishme në historinë moderne të Kosovës.
”Mes tyre, Adem e Hamëz Jashari ishin dy emrat e përveçëm mbi figurat e të cilëve do të bartej lavdia e asaj rezistence dhe frymëzimi prej luftës së tyre për lirinë e Kosovës. Para më shumë se 30 vitesh Adem dhe Hamëz Jashari së bashku me shokët e tyre i filluan organizimet e para për një ushtri të Kosovës që më pas do quhej Ushtria Çlirimtare e Kosovës”, u shpreh Kurti.
Krerët shtetërorë së bashku me Rifat Jasharin, u nisën drejt obeliskut të dëshmorëve që gjendet në hapësirat e kësaj kazerme.
Aty nderuan kontributin e të rënëve për liri, ku pati edhe të shtëna nderi në nderim të dëshmorëve, martirëve e gjithë të rënëve.
