Shkallët e para të banesës ku jetonte në Kaçanik, rreshteri Muhamed Lika i ngjiti si çdo ditë tjetër pas punës.
Por, me të mbërrit në katin e dytë, në drejtim të policit dy burra me kapelë shkrepën katër plumba, njëri prej tyre vrau pjesëtarin e Policisë së Kosovës.
Shenjat e krimit, mbetën si dëshmi në shkallët e korridorit.
Por, dy burrat e rinj që dyshohet se qëlluan 48 vjeçarin ikën në këmbë pasi kryen aktin.
Pas tyre është vënë Policia e Kosovës.
E krejt skenën e krimit që tronditi Kosovën, e përshkroi Kryeprokurori i Prokurorisë Themelore në Ferizaj, Burim Çerkini.
Sipas Çerkinit, nga provat materiale duket si vrasje e planifikuar.
E në vitin 2021, të ndjerit Muhamed Likës i është djegur një lokal nga persona të paidentifikuar.
Çerkini tha se po hetohet edhe kjo pistë.
Sipas prokurorit të rastit, Ismet Rrahmani, zyrtari policor ka pasur një plumb tejshkues.
Për këta akt ka reaguar edhe ministri i punëve të brendshme, Xhelal Sveçla.
Ai ka thënë që sulmi ndaj çdo pjesëtari të Policisë së Kosovës është sulm i drejtpërdrejtë ndaj rendit, institucioneve dhe sigurisë së Republikës së Kosovës.
Edhe sindikata e Policisë ka dënuar vrasjen e rreshterit Muhamed Lika në Kaçanik, duke e cilësuar atë si atentat dhe sulm të drejtpërdrejtë ndaj sigurisë publike dhe vetë shtetit të Kosovës.
