Nga rrëshqitja e dheut në Kishnicë, rruga Prishtinë-Gjilan u bllokua mëngjesin e sotëm. Si pasojë, udhëtarët mbetën të ngujuar, madje pati prej tyre që humbën fluturimin. Reshjet shkaktuan dëme edhe në Prishtinë, por sipas MPB-së, situata është nën kontroll.
Një ndër ta ishte Fadil Kryeziu nga fshati Roganë i Kamenicës.
“N’mëngjes një orë e gjysmë këtu kemi mbetë nja 7-8 kerre edhe kërkush nuk intervenoje deri kur ka ardhë policia dikur me vonesë, por atëherë falë tyre kanë dalë një kamion kanë bo tërheqjen e gjitha kerreve që kanë qenë këtu prezent”, tha Fadil Kryeziu.
E nga bllokimi i rrugës, Imer Bunjaku humbi fluturimin e tij për në perëndim.
“Na e hupëm aeroplanin për shkak të kësaj rruge që u mshel, u desht me u kthy tash për shpi apet”, u shpreh Imer Bunjaku.
Megjithatë kjo nuk është hera e parë që qarkullimi bëhet i pamundur.
Sa herë që bie shi, kjo pjesë e rrugë Kishnicë-Gjilan bllokohet për shkak të rrëshqitjeve të dheut.
E gjatë paradites së të hënës, në Kishnicë ishte edhe zv-ministri i Infrastrukturës, Hysen Durmishi për të vlerësuar situatën.
Ndërsa reagime për bllokimin e kësaj rruge pati edhe nga opozita, të cilët kritikuan ritmin e ngadaltë të punimeve në autostradën Gjilan-Prishtinë.
Tëvë1 ka pyetur Ministrinë e Mjedisit, Planifikimit Hapësinor dhe Infrastrukturës për planin e kësaj ministrie që të evitohet një problem i tillë për udhëtarët, mirëpo i njëjti institucion nuk i është përgjigjur interesimit të televizionit.
Ndërkaq, reshjet e shiut shkaktuan edhe dëme të konsiderueshme edhe në disa lagje në Prishtinë.
Megjithatë sipas Ministrisë së Punëve të Brendshme, situata është nën kontroll dhe me ndihmën e zjarrfikësve, të gjitha pengesat janë mënjanuar.
