Vendimin për këtë e mori Drejtoria e Inspektoratit në Podujevë teksa aksioni u mbështet edhe nga policia.
Shkak për rrënim janë dyshimet se villa është ndërtuar pa u pajisur me lejet e nevojshme.
Televizioni e ka konfirmuar se kjo shtëpizë ishte pronë e qytetarit Menduh Lluka.
Lluka përmes telefonit ka thënë se vendimi për rrënim është i paligjshëm pasi çështja është në proces gjyqësor.
Ai shton se do të ankohet deri në fund.
“Gjykata e Apelit ka pas me pru vendim për masë të përkohshme. E dyta, na me datën 18 kemi bo kërkesë për shtyrje të këtij procesi në Gjykatën Themelore të Prishtinës sipas ligjit, këta se kanë prit asnjëren hiq edhe kanë ardh me e rrënu sot”, tha pronari i vilës së rrënuar.
Sipas tij, në momentin e rrënimit brenda e kishte familjen, përfshirë të birin e sëmurë.
“Unë e kam pas djalin epileptik, e kam djalin paraplegjik, ma kanë lëviz djalin prej shtëpisë aty dhe e kanë rrënu shtëpinë, shtëpinë me krejt sendet brenda, as nuk më kanë lanë me fol as me heq sende.
Nga Komuna e Podujevës i kanë thënë televizionit se parashihet rrënimi edhe i villave të tjera.
Villat të cilat do të rrënohen janë në afërsi të Liqenit të Batllavës, janë gjithsej 8 objekte, 5 nga to villa dhe 3 janë pllaka në proces të ndërtimit.
Shtëpiza në zonën përreth Liqenit të Batllavës janë rrënuar edhe në të kaluarën, teksa aksioni i fundit ishte në gusht të këtij viti.
Kronika e realizuar nga Gojart Jashari
