Nënën, dhe dy vajzat, Qëndresën dhe Mirdonën, Enver Lipaj i humbi në luftë.
Personat më të dashur të tij, forcat serbe ia vranë, dhe më pas ia hodhën në bunar.
Ato janë në mesin e viktimave nga masakra mizore në fshatin Sudenicë të Istogut.
“Këto kanë ra për të mos vdekur kurrë”…. “Këto që rrezatojnë në këtë pllakë, tri herë i kanë vra. Njëherë i kanë vrarë me plumb, të dytën here kanë mendu mos kanë mbet gjallë, i kanë hedh në bunarë dhe e treta herë është që mos janë gjallë prapë dikush i kanë eksplodu bunarin” , rrëfen Lipaj.
Trupat, Lipaj tregon se i gjetën tek pas disa ditësh.
“Na i kemi gjete me 27 qershor, i kemi nxjerr prej bunarit. Unë jam pjesëtar i UCK-së, unë kam mbet këtu tu i kerku mos po gjenden kund se baba i të shoqës, dy qikat, Qendresa dhe Mirdona, babgjysh e kanë pas, dhe nana jem ka qene aty pranë” , ka treguar ai.
Në përvjetorin e masakrës, në Kosovë nga diaspora ka ardhur edhe vëllau i Enverit, Xhaviti.
“Ky është malli ky është shpirti ky është dhimbja që e mbaj 26 vjet dhe sic thash edhe më parë era nuk mi ka marrë fjalët kanë qenë gjithmonë brenda meje. Por kohët e fundit kam fillu që erës unë të ia marrë fjalët dhe ti kem në libër” , shprehet Xhavit Lipaj
Për këtë krim të rëndë akoma nuk është vendosur drejtësia.
Familjarët shpresojnë që një ditë përgjegjësit e kësaj masakre të marrin dënime maksimale.
