Lulet po i vendosë tek vendi ku 25 vite më parë humbi motrën e tij, Valdeten.
Më 13 mars të vitit 1999, në tregun e Mitrovicës, ajo kishte dalë me pesë anëtarë të tjerë të familjes Strana për t’u përgatitur për fejesë.
Por e shtuna e asaj date doli të jetë e fundit ditë në jetën e saj.
Kjo për shkak të sulmit me minahedhës nga forcat serbe, prej ku mbeti e vrarë Valdete Strana me pesë persona tjerë.
E 128 u plagosën.
Me dhimbje e mall, të freskët e ka kujtimin për të i vëllai, Rrustem Strana.
“22 vjeçare o kon, edhe problemi o kon që ajo gjashtë muj ditë s’ka dale n’qytet kurrë. Qat ditë u dale edhe ka pësu. Krejt shkun tjerët, ai mixha pat qejf me marrë tha hajde edhe tip o kam qejf me të marrë ty, po qe…”, shprehet Rrustem Strana- familjar.
Lajmin për vrasjen e njërës motër e plagosjen e dy të tjerave ai nuk e kishte kuptuar menjëherë.
“Janë plague djemt e filanit, e qaq shumë m’u dhimtën sa që u tmerrova. Masanej e kuptova që diçka krejt tjetër ish kanë…”, thotë ai.
E atë ditë marsi në treg kishte qenë edhe Azem Beqiri.
“Kjo është plaga jem, jam katër vende në dorë, jam në bel, edhe dy copa në gjoks. Për fat të mirë kemi pshtu, atëherë isha 17 vjeçar si mbajtës i familjes, t’u punu…”, shprehet Azem Beqiri – i mbijetuar i masakrës.
Ai shprehet i zhgënjyer me kujdesin që kanë marrë deri më tash nga shteti.
“Nuk kanë bo kurgjo për neve. Nuk jemi shumë, na kanë lënë anash, nuk janë t’u na trajtu si duhet. Na kanë lënë me një pension 120 euro, jam mbi 50 përqind i plagosur, invalid i përjetshëm, kjo është pagë e tmerrshme”, thotë ai.
Për të nderuar viktimat dhe kujtuar masakrën e tregut në Mitrovicë, erdhi edhe kryeministri Albin Kurti, i cili theksoi domosdoshmërinë për drejtësi për viktimat e kësaj masakre.
