Tash e më shumë se një dekadë këto mjete janë bërë pjesë e jetës së tij.
Hajdar Selimoviqit, lëndimet që i mori në duar dhe në këmbë gjatë kohës sa punonte si pastrues po ia vështirësojnë jetën.
Për krejt padrejtësitë që thotë se iu bën, doli të protestoj në ditën e punëtorëve.
“Unë jam invalid i punës, dy lëndime i kam pas në vend të punës, sakat jam, i marr 100 euro. Unë 2012 jam lënduar, mu punëdhënësi vetëm 3 muaj ditë ma ka pagu punën, mas 3 muajve me ka thanë në desh më punu ke rrogë nëse nuk do rri në shpi, mua më është dashur ashtu me punu, tek mjekët shkojsha me thoshin nuk guxon me punu prej dorës”, thotë ai.
Selimoviq i cili vjen nga Medvegja por jeton në Prishtinë thotë se e ka të vështirë të jetoj me 100 euro.
E fatin e njëjtë, nga vitit 2016 e deri në fund të vitit 2023, e patën edhe mbi 1 mijë persona të tjerë në Kosovë.
Nga Qendra për Trajnime dhe Burime për Avokim – ATRC, kanë treguar sa persona kanë humbur jetën në vendin e punës.
“Nga vitit 2016 e deri në fund të vitit 2023 janë 1072 aksidente, ndërsa janë 120 aksidente që kanë përfundu me vdekje”
Madje nga ATRC në bazë të një hulumtim të bërë kanë gjetur se ka një neglizhencë nga sistemi i drejtësisë për këto raste.
“Ka vonesa në ngritjen ne aktakuzave në raste kur ka vdekje, si dhe aktgjykimet janë duke dhënë dënime shumë të lehta për punëdhënësit me gjoba zakonisht dhe jo me burgim ashtu sic e parash kodi penal ne 10-12 vjet burgim. .. Nga 234 kallxim penal sa janë përcjell vetëm 100 prej ktyre janë trajtuar edhe janë ngritë aktakuza dhe hetimet janë nis me vonese.”, thotë Lirika Bakija nga ATRC.
Kurse sipas kryetarit të Sindikatës së Sektorit Privat, Jusuf Azem punëtorët janë duke trajtuar në mënyrën më të keqe të mundshme.
“Punëtorët e sektorit privat i gjen me një pagë më të ulët në rajon e cila edhe sot zyrtarisht është 130 euro-170 euro. Punëtorët e sektorit private ende i gjen me një mungesë të trajtimit adekuatë, nuk ke sigurime shëndetësore, nuk kemi një gjykatë të punës, këtë periudhë një vjeçare trajtimi i puntorëve është bërë në mënyrën me te keqe.”, thotë Azemi.
Sipas raportit të publikuar nga ARCT “Viktimat e Padrejtësisë”, Inspektorati i Punës vazhdon të ketë sfida sidomos në numrin e inspektimeve si dhe ky inspektorat nuk ka regjistër të bizneseve “recidiviste” të cilat janë gjobitur nga ky institucion.
