Kreu i kësaj familje kërkon drejtësi për të vrarët.
Fadil Muqolli me mallin e familjarëve, kujton ditën e ftohtë të 17 prillit, ku u vranë 53 persona.
“I kanë marrë babën, Sinanin dhe Ymer Elshanin dhe i kanë ekzeketu. Menjëherë kanë hy brenda dhe e kanë hapë derën i kanë hudhë dy bomba. Kanë hy brenda me pushkë automatike derisa kanë mendu se i kanë vra të gjithë. Prej kësaj dhome kanë shpëtu gjashtë persona”, thotë ai.
Për dy ditë, Muqolli thotë se forcat serbe i dogjën të vrarët, ndërsa UÇK-ja mblodhi eshtrat e tyre në thasë e i vendosën në një bunker, deri pas përfundimit të luftës kur edhe u rivarrosën.
Mirëpo për lajmin e vdekjes së 14 anëtarëve të familjes së tij, ai e mori vesh nga vëllai.
“Vllau e ka marrë vesh po atë natë, ka ardhë ka hy brenda, kur kanë qenë veç një herë të djegur i ka pa dhe të nesërmen jam taku me vllaun më ka tregu”.
E në dhomën e gjumit i ka të vendosura librat dhe fletoret e katër fëmijëve, bashkë me rrobat e ruajtura që nga ajo kohë.
Ai mbyll dyert e kësaj shtëpie, me shpresë se sistemi kosovar do të vendosë drejtësi.
Në këtë masakër u vranë anëtarë të familjes Muqolli, të familjes Cerraku, Elshani dhe Hoxha. Prej tyre 23 fëmijë.
Kronika e realizuar nga Albiona Hajdari
