Kudo që t’shkon, kur e ke plisin thonë shqiptar qenka ai.
Plisin ka një vit që e mban.
Shkak për këtë janë vrasjet e civilëve nga forcat serbe gjatë luftës në Kosovë.
Madje për të ruajtur simbolin kombëtar, të moshuarit dhanë edhe jetën.
E gjithë këtë, Ruzhdi Kryeziu nga Pagarusha e Malishevës e kishte parë në një video.
Prandaj të gjata u bënë minutat deri në vendosjen e kapelës së bardhë.
“Gjysa e komunës së Suharekës kanë qenë në Bellanicë kur na morën serbët. Diku nëpër Astrazub, Malishevë e Rahovec t’u i çu për Shqipëri, t’u i vra. T’u ju marrë plisat t’u i qitë n’tokë; ai gjuaj në tokë serbi, plaku nalu qit n’kry. Mos e qit se t’mys, e vrau për plis”.
E duke e parë këtë ngjarje, ish Komandant Togu mori një vendim.
“Kajta edhe vendosa, të enjten është treg në Malishevë, e martë e mërkurë më janë duk dy vjet dy ditë me shku me ble më shpejt. Shumë shokë e baba e gjysha tonë janë vra për plis, sot as nuk të rreh kush, as nuk të vret kush. Kam shku e kam ble e e kam qitë, është simboli ynë”, deklaroi ai.
E nga Malisheva në Drenicë, në krye të odës e mban plisin i mbijetuari i masakrës së Izbicës, Milazim Thaçi.
Ndërsa nga koka nuk e hoqi as kur shkoi për të dëshmuar në Gjykatën Speciale në Hagë.
“Kem aty te dera e gjyqit, dy polic na rujshin, doli një gjykatës. Tha cili jeni Thaçi, thashë unë, tha a bën me të pytë diçka, thashë po mor fol. A po don me hy me kapuç t’bardhë, a pa kapuç t’bardhë? Për qejf tanin. Thashë për qejf temin po du me hi me kapuç t’bardhë me kallëzu veten prej kahit jam, kush jam e çka jam, thashë edhe Slloba e ka mërzi. Ja ka nisë me kesh, tha jo jo veç ti qysh t’dush…”, tha ai.
Për plisin si element identifikues e kulturor i shqiptarëve, vitin e kaluar u mbajt edhe festival në kryeqytet.